Dagdā pyrmyzruode dokumentalai filmai par akmiņa ols dareišonu

Dagdā pyrmyzruode dokumentalai filmai par akmiņa ols dareišonu

Rokstu sagataveja: portals lakuga.lv

Dagdā Annys dīnys nūtikšonā šudiņ, 29. julī, 16.00 stuņdēs pyrmizruodi pīdzeivuos dokumentaluo kina “Akmens alus darīšanas tradīcija Dagdas novadā”, viesteits Dagdys sātyslopā.

Kai stuosta dokumentaluos kinys projekta vadeituoja Evika Muizniece, ols ir naatjamama latvīšu tautys kuknis i svātku golda sastuovdaļa. Tys bīži pīmynāts tautysdzīsmēs, puorsokuos, sokamvuordūs i meiklēs, raizem ar juo pamatsastuovdaļom – mīžim i apeinim.  Myusdīnuos ola dareišona ir gondreiž kai mūdis līta. Tok latvīšim rakstureigajai ola bryuveišonys tradicejai vairumā gadejumu ir bejs puorruovums i jaunī muojražuotuoji vysbīžuok izmontoj uorzemēs aizgiutys ola ražuošonys tehnologejis.

Karteņa: ekransuovīņs nu kinys

Akmiņa ols unikalitate ir juo gataveišonys tehnologejā. Ols dareišona kūka traukūs ar nūkaitātim akminim ir arhaisks pajiemīņs, kas ilgstūši beja izmontuots da laika, cikom beja daīmami metala trauki voi saimisteiba jūs varēja finansiali atsaļaut. Dūmojams, ka akmiņa ols dareišonys tradiceja varātu byut pat godu tyukstūti vaca. Ols gataveišonai napīcīšams lels daudzums iudiņa, deļtam tū vysbīžuok siļdeja pierts kubulūs. Kod iudini pīlej zlauktā, kas ir kūka trauks ar topu, kurā gatavej olu, tam ir juobyun korstam. Iudiņa temperaturys uzturiešonai i ceļšonai zlauktā tyka svīsti guņskurī vairuokys stuņdis karsāti akmini, kas puorkaiseiti ar rudzu myltim, lai tī dadūd kruosu i uztur akmiņam degšonys temperaturu. Piec misys nūtacynuošons zlauktā nu jauna teik līts korsts iudiņs i svīsti akmini. Tod ols teik dzasāts, ryudzāts i piļdeits bucuos, procesu skaidroj Evika.   

Karteņa: ekransuovīņs nu kinys

Niu itū unikalū akmiņa ols gataveišonys tradiceju praktizej viņ ratais. Tys ir gryuts i ilgs process, kas naatsamoksoj ni finansiali, ni laika ziņā, tok ola tradiceju paziniejs nūteikti nūvērtēs gon garšys autentiskumu, gon gataveišonys meistareibu. Tradiceja ir pi izzusšonys rūbežys. Entuziastu, kas īsavuiciejuši voi puormontuojuši itū ola gataveišonys pajiemīni, ir cīši moz, asūšī meistari ir pusmyužā voi pensejis vacumā. Deļtam projekta “Akmens alus darīšanas tradīcija Dagdas novadā” mierkis beja radeit dokumentalū kinu, kurā byutu paruodeits gon akimņa ols dareišonys process, gon tam vajadzeigī materiali i izejvīlys, akmiņa ols dareišonys raksturuojums myusdīnu apstuokļūs, gon ari īkļauti akmiņa ols dareišonys meistara komentari, pīzeimis i ticiejumi, kas juojam vārā, dorūt akmiņa olu, pībylst projekta vadeituoja.

Karteņa: ekransuovīņs nu kinys

Akmiņa olu piec vacajom tradicejom dora meistars Juoņs Maļkevičs Kruoslovys nūvoda Ondrupinis pogosta “Olovecūs”.  Projekta radūšuo komanda – Evija Maļkeviča-Grundele, Juris Lisovs, Oskars Lūsis i Juris Viļums.

Dokumentalū kinu varēs nūsavērt ari kanalā “Re:TV” 5. augustā 22.00 vokorā.

Print Friendly, PDF & Email

Nūtikšonu kalendars

Jan
26
Tre
vysu dīnu Nūvodpietnīceibys lasejumi prāve... @ Bolvu Nūvoda muzejs, tīšsaiste
Nūvodpietnīceibys lasejumi prāve... @ Bolvu Nūvoda muzejs, tīšsaiste
Jan 26 vysu dīnu
Nūvodpietnīceibys lasejumi prāvesta Alberta Budžis pīmiņai @ Bolvu Nūvoda muzejs, tīšsaiste
Gūdynojūt prāvesta Alberta Budžis (1930–1957–2017) atceri, Bolvu Centraluo biblioteka aicynoj pietnīkus pīsadaleit “Novadpētniecības lasījumos prāvesta Alberta Budžes piemiņai”. Tēmu lūks nav īrūbežuots, jis ītvar sevkuru pietnīku interesejūšu jūmu, kurys izpietis teritoreja ir Bolvu nūvods. Lasejumu[...]
Jan
28
Pīk
19:00 Gruomotys “Mīlas kastings” muzyk... @ Babeitis Kulturizgleiteibys centrs
Gruomotys “Mīlas kastings” muzyk... @ Babeitis Kulturizgleiteibys centrs
Jan 28 @ 19:00 – 21:00
Gruomotys "Mīlas kastings" muzykaluo prezentaceja @ Babeitis Kulturizgleiteibys centrs
28. janvarī 19.00 Babeitis Kulturizgleiteibys centra lelajā zalē, Piņkūs, nūtiks rakstneicys Ilzis Aizsilys gruomotys “Mīlas kastings” muzykaluo prezentaceja.   Par latgalisku nūskaņu pasaryupēs: rakstneica Ilze Aizsila i improvizators Viesturs Vizulis; muzykys grupa “Dabasu Durovys”; videjuos[...]