Rokstu sagataveja: portals lakuga.lv

7. augustā 11. stuņdēs Kruoslovys nūvoda Osyunā, Školys īlā 12, Konstantina Raudivis kulturviesturiskuo montuojuma centrā, tiks atkluota izstuode “Konstantīns Raudive – latvietis Eiropā”, kas te byus apsaverama da 31. augusta, piec tam – Dagdā i Kruoslovā, informej Konstantina Raudivis kulturviesturiskuo montuojuma centra i ituos izstuodis projekta vadeituoja Laura Pauliņa.

Izstuodis atkluošona nūtiks Osyuna pogosta svātkūs, juos izveide ir atbaļsteita Latgolys kulturys programā 2021 vēļ kai Dagdys nūvoda pošvaļdeibys projekts. Nu 1. septembra da 30. septembra izstuode byus apsaverama Dagdys Turisma informacejis centrā (TIC), bet nu 1. oktobra da 29. oktobra ar jū varēs īsapazeit Kruoslovā.

K. Raudive (1909–1974) ir Latvejā dzymuse personeiba, spūžs intelektuaļs i vīns nu spūdruokūs Eiropys mārūga dūmuotuoju ar sasnāgumim pasauļa mārūgā, kai rakstnīks, filozofs i parapsihologs. Izstuodē apsaveramī informativī stendi atainoj K. Raudivis dzeivis guojumu, juo radūšū darbeibu, izdūtuos gruomotys, davumu parapsihologejā, autora dūmu gryudus, kai ari Raudivis saimis dzymtys kūku.

Par izstuodē pīduovuotajom novitatem L. Pauliņa soka: “Izstuodis projekta mierkis ir popularizēt Raudivis dzymtuos sātys vītys apleicīni i juo davumu. Izstuodi veiduos 10 informativī stendi, kotrys nu jūs veļteits kaidam Raudivis dzeivis pūsmam voi aizaraušonai. Kas pavysam jauns myusu pīduovuojumā ir juo dzymtyskūks. Asam sasazynuojuši ar juo radineicu, jei dzymtyskūku ir maksimali preciziejuse. Izstuodis fonā skanēs Raudivis īraksteitī bolsi. Mes īsadūmuojom, ka tys izstuodei dadūtu drupeit mistisku auru.”