VVC paplašynoj konsultativū atbolstu latgalīšu rokstu volūdys lītuotuojim

VVC paplašynoj konsultativū atbolstu latgalīšu rokstu volūdys lītuotuojim

Rokstu sagataveja: portals lakuga.lv

Sekmejūt latvīšu volūdys kulturvidis sakuortuošonu Vaļsts volūdys centrs (VVC) palelynoj konsultaceju apjūmu dzeivuotuojim i organizacejom latvīšu volūdys viesturiskuo paveida – latgalīšu rokstu volūdys – praktiskuos lītuošonys vaicuojumūs. Saskaņā ar vaļsts volūdys politikys pamatnūstuodnem Latvejis Republikys Tīslītu ministreja ir roduse vareibu izveiduot atsevišku konsultanta omotu ar specializaceju latgalīšu rokstu volūdā, informej Vaļsts volūdys centra Administrativuo departamenta vacuokais referents Rihards Veršiņins.

Dorbu VVC suoc lingvists Armands Kociņš-Kūceņš, kura pamataizdavums ir ryupētīs par latgaliski publiskojamūs tekstu atbiļsteibu raksteibys nūsacejumim i volūdys tradicejom. Tai kai A. Kociņš-Kūceņš ir eksperts i latgalistikā i baltu volūdnīceibā kūpumā, i ari suomugru lingvistikā, jis ir gotovs aktivi veicynuot latgaliski i lībiski radeitūs tekstu kvalitativu funkcioniešonu sabīdreibā.

Sovu omota vizeju skaidroj Armands Kociņš-Kūceņš: “Satversmē ir pastreipuota latvīšu volūdys kai vīneiguos vaļsts volūdys nūzeime saskaņā ar myusu vaļsts identitati i pastuoviešonys jāgu. Saleidzynuojumā ar Atmūdys laika situaceju, kod myusu volūda vēļ tikai atgiva sovu statusu, itūšaļt asam sasnāguši taidu sabīdreibys integracejis pakuopi, ka latvīšu volūda vaļstī funkcionej kai golvonais sazinis leidzeklis vysu jūmu lītvedeibā, apkolpojūšajā sferā, izgleiteibā i storpetniskajūs kasdīnys kontaktūs. Pasateicūt efektivi eistynuotai vaļsts volūdys politikai, VVC darbeibai i sabīdreibys atbolstam, risks, ka latvīšu volūda varātu tikt izmīgta nu kaidys svareigys lītuošonys sferys, 30 godu laikā ir īvārojami sasamazynuojs. Partū juopīkreit Tīslītu ministrejis i Izgleiteibys i zynuotnis ministrejis ekspertu jaunuokajim pīzynumim, ka pošlaik vajagams koncentrētīs na viņ iz vaļsts volūdys aizsardzeibu, bet vairuok – iz juos atteisteibu. Tū var veicynuot, ari palelynuot sabīdreibys interesi par taidom vaļsts volūdys sakņu rezervem kai latgalīšu rokstu volūda, izlūksnis i lībīšu volūda.”

Armands Kociņš-Kūceņš vaira kai 20 godu aktivi dorbojās baltu i suomugru volūdnīceibā, ir struoduojs Daugovpiļs Universitatē, Rēzeknis Tehnologeju akademejā, Latgolys Pietnīceibys institutā, pīsadalejs latgalistikys konferencēs, latgalīšu raksteibys nūsacejumu apstyprynuošonys seminarūs, latgalīšu školuotuoju kursūs, kai ari lingvistiskajuos ekspedicejuos vysūs Latgolys nūvodūs i latgalīšu diasporā. VVC lingvists givs pīredzi 14 vysaidu latgalistikys projektu eistynuošonā i jau da šam ir konsultiejs latgalīšu rokstu volūdys lītuotuojus gramatikys, leksikys, stilistikys i terminologejis vaicuojumūs.

Latgalīšu rokstu volūdys kai vaļsts volūdys paveida atteisteibys juridiskais ītvors tyka radeits jau 1999. godā, īrokstūt attīceigys garantejis Vaļsts volūdys lykuma 3. pantā. Nu 2003. gods VVC dorbojās ekspertu komiseja, kas rysynoj latgalīšu rokstu volūdys vaicuojumus.

Sabīdreibai ir nūtureiga interese par latgalīšu raksteibys lītuošonu teimekļa vidē, presē, gruomotuos, pasuokumu afišuos, plakatūs, ceļa ruodeituojūs, uzrokstūs, turisma izdavumūs, produktu etiketēs itt. Reizē ir pastuoveigs pīprasejums piec īsacejumim, kai tekstu latgaliski pīraksteit pareizi, tok da šam skaidruojumi dūti īrūbežuotā apjūmā i nasistematiski. Īvīšūt jaunuo lingvista omotu, VVC varēs nūdrūsynuot regularu i specializātu atbolstu volūdys lītuotuojim piec “latgalīšu rokstu volūdys vīnuotuo konsultaceju punkta” principa.

Papyldu informaceja: VVC konsultej privatpersonys, uzjāmumus, vaļsts i storptautyskys institucejis, pošvaļdeibys, bīdreibys i cytus interesentus. Dazynuošonu par latgaliski raksteitu tekstu pareizeibu, ari nūsaukumu, vītvuordu i personvuordu lītuošonu atbylstūši Latgalīšu raksteibys nūsacejumim, VVC Latgalīšu rokstu volūdys apakškomisejis lāmumim, volūdnīku īsacejumim i latgalīšu rokstu volūdys tradicejom var sajimt, zvonūt konsultantam pa telefonu 67334627 ci nūsyutūt pīprasejumu iz e-posta adresi pasts@vvc.gov.lv ci pa postu iz adresi: Eksporta iela 6, Rīga, LV-1010.

Print Friendly, PDF & Email

Kalenders

Apr
25
Cat
11:00 Festivals “Steigys” @ Juoņa Ivanova Rēzeknis muzykys vydsškola
Festivals “Steigys” @ Juoņa Ivanova Rēzeknis muzykys vydsškola
Apr 25 @ 11:00 – 17:00
Festivals "Steigys" @ Juoņa Ivanova Rēzeknis muzykys vydsškola
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 25 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Koncerts “Celīs, bruoļ!” @ VEF Kulturys piļs
Koncerts “Celīs, bruoļ!” @ VEF Kulturys piļs
Apr 25 @ 19:00 – 21:00
Koncertā pīsadola kai jau populari i labi pazeistami, tai i pavysam jauni, dažaidus muzykys stilus puorstuovūši muokslinīki: Juoņs Aišpurs (THE SOUND POETS), Arņs Slobožaņins (DABASU DUROVYS), Guntis Rasims i Jurs Vucāns (BEZ PVN), Jurs Ostrovskis[...]