Izguojs “Tāvu zemes kalendars 2022”

Izguojs “Tāvu zemes kalendars 2022”

Roksta autors: portals lakuga.lv

Latgolys Kulturys centra izdevnīceibā izdūts kasgadejais “Tāvu zemes kalendars 2022”, tys kulturviesturiskai i literara godagruomotai ir 32. (83.) goda guojums i juos tiraža itūreiz 2000 eksemplaru, portalu lakuga.lv informēja Latgolys Kulturys centra izdevnīceibā.

Kalendarā, kai vysod, kalendarejs i astronomiska informaceja, Rēzeknis–Aglyunys diecezis goreidznīku saroksts, roksti par lauksaimisteibys, medicinys, arheologejis, viesturis, kulturviesturis, volūdys, nūvodpietnīceibys vaicuojumim, kai ari literatura, kritika i publicistika. Kai īrosts, sovys atminis par saimis viesturi publicej Latgolys īvārojamuokūs dzymtu puorstuovi, godagruomota pīmiņ ari aizguojiejus – žurnalistu Pīteri Tabūnu, rakstneicu Diānu Varslavāni, nūvodpietnīku Jōni Būmani, trymdys tautīti Ati Ontonu Homku.

Itūreiz poši interesantuokī redzīs Latgolys viesturei veļteitī roksti, pīmāram: arheologa Jura Urtāna par jaunatkluotajim piļskolnim Ondrupinis i Feimaņu pogostūs, nūvodpietnīka Valentīna Edmunda Klešnika par Mozū Cyblu, kinorežisora i Latgolys kulturys entuziasta Jōņa Streiča par Ludzys pusis Juzefinovu – Anatolija Gorbunova seņču zemi. Sovūs redzīņūs par latgalīšu rokstu volūdu dalejušīs Jūlijs Trōps i Pīters Turkopuls. Rubrikā “Kulturvēstures pīminekli” – par 19. g. s. izdavumim, kurymūs apraksteiti Vitebskys gubernis latvīšu tārpi, i buramajim vuordim.

Literaturys, kritikys, publicistikys tekstu daļu veidoj jau skaiteituojim pazeistami autori, kai Ilze Keiša, Oskars Seiksts, Voldemārs Vogulis, Magdalena Vjatere, Jūlijs Trōps, Leonards Rakickis, Rūdolfs Linužs, Pīters Meikstums, Evelīna Visocka, Ernests Vilcāns, Romons Spaitāns, Pīters Poļaks, Imants Zeltiņš, Vilis Mileiko.

Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]