Rokstu sagataveja: portals lakuga.lv

Bīdreiba “Lobs” kūpā ar uzjāmumu “Puordare” i zeimyna “Liana Valis” dybynuotuoju organizej rodūšuos darbneicys Latgolys jaunīšim – 20. augustā 18.30 stuņdēs Preiļūs, jaunīšu centrā “Četri”, 28. augustā Ludzys nūvoda Kuorsovys kulturys nomā i 4. septembrī Rēzeknis nūvoda Rogovkys jaunīšu centrā. Darbneicuos varēs izveiduot sovu latgalīša logo, kai ari īsavuiceit sītspīdis apdrukys pamatus i īvyngrynuot rūku sovu maiseņu apdrukavuošonā. Vītu skaits īrūbežuots, partū īprīškeja dasasaceišona.

Kai stuosta uzjāmuma “Puordare” puorstuove Ingūna Semule, “Dizainēts latgalietis” nūdarbeibu mierkis ir radeit jaunīšūs izratni par muokslys īspiejom Latgolā i veicynuot jūs lokalpatriotismu.

“Kotrā nu vītu byus div darbneicys – dizaina i sītspīdis. Dizaina darbneicā dalinīki ar zeimyna “Liana Valis” veiduotuoju varēs izstruoduot sovu latgalīša logo, tok sītspīdis darbneicuos kūpā ar uzjāmumu “Puordare” byus vareiba apdrukuot auduma maiseņus ar Latgolā radeitim treis dizainim i tekstim,” par darbneicu nūrisi stuosta Ingūna.

Vysi treis dizaini, nu kurūs jaunīši varēs izalaseit meiluokū, īt nu Latgolys – vīns ir deju studejis “Stop Time” Rēzeknis filiālis vadeituojis i horegrafis Liānys Merņakys-Ņikitinys aba “Liana Valis” radeits dizains, ūtrais ir vīna nu Oskara Orlova aba Raibuo karikaturu nu serejis “Obrozi”, a trešais – ir Valentina Lukaševiča dzejis vuordi.

“Muns kai idejis autoris mierkis beja atrast veidu, kai jaunīšūs interesantā i saistūšā veidā maksimali vairuok raiseit lokalpatriotisma jiutys i popularizēt latgalīšu volūdu, saistūt tū ar itūšaļt aktualom i interesantom lītom. Atsauceiba ir nagaideitai lela, tycu, ka tys byus lobs pamats cytā godā turpynuot ar leidzeiga satura aktivitatem,” doluos Ingūna.

Ituos aktivitatis atbolsta Latgolys Regionaluos atteisteibys agentura, Vaļsts kulturkapitala fonds i A/S “Latvijas valsts meži”.