Latgalīšu rokstu volūdys vuiceišonai byus vaļsts finansiejums

Latgalīšu rokstu volūdys vuiceišonai byus vaļsts finansiejums

Rokstu sagataveja: portals lakuga.lv

Nūdybynuojums “Latgalīšu volūdys, literaturys i kulturviesturis školuotuoju asociaceja” (LVLKŠA) aicynoj da 31. augusta dasasaceit īinteresātuos školys i školuotuojus, kuri ar 2021./2022. vuiceibu goda septembri grib vuiceit 36 stuņžu kursu latgalīšu rokstu volūdā, kab sekmēt juos nūsastyprynuošonu i atteisteibu. Ir izpiļdeiti vysi formalī nūsacejumi, kab latgalīšu rokstu volūdu voi nūvodu vuiceibu īvīstu školā, partū ka apstyprynuoti i vuiceibu prīškmatu standarti (2019), i programu paraugi (2021), informej nūdybynuojuma “Latgaliešu valodas, literatūras un kultūras vēstures skolotāju asociācija” vaļdis prīšksādātuoja Veronika Dundure.

AS “Latvijas valsts mežu” mierkzīduojums ļaun vairuok nakai 25 školuos Latgolā nūdrūsynuot kursa “Latgaliešu rakstu valoda” vuiceišonu i samoksu pedagogim par padareitū dorbu. Tys ir suokums latgalīšu rokstu volūdys plašuokai apgivei izgleiteibys īstuodēsatbylstūši Latvīšu viesturiskūs zemu lykuma  4. panta 8. punktā nūsaceitū: “Vaļsts i attīceiguos pošvaļdeibys nūdrūsynoj latgaliskuos identitatis i kulturviesturiskuos vidis saglobuošonu i ilgtspiejeigu atteisteibu, tamā storpā veicynojūt latgalīšu volūdys kai latvīšu volūdys paveida apgivi, tymā skaitā izgleiteibys īstuodēs, i lītuojumu publiskajūs pasuokumūs i kasdīnys dorbā, kai ari atjaunojūt i vidē izmontojūt vītvuordus latgalīšu volūdā, tymā skaitā ceļazeimēs, vītu i īlu nūsaukumūs.”

Gribiešonu vuiceit latgalīšu rokstu volūdu fakultativi jau pasacejuse Nautrānu vydsškola, Baļtinovys vydsškola, Ludzys piļsātys vydsškola i Rēzeknis 5. vydsškola. LVLKŠA sadarbeibā ar augstškolu vuiceibspākim i školuotuojim, kuri jau vuica latgalīšu rokstu volūdu, organizēs projektā īsaisteitajim školuotuojim kursus (72 stuņdis) i paleidzēs ar metodiskū atbolstu.

Kab Latgolys školānūs atteisteitu teritorialū identitati, tai styprynojūt nacionalū i vaļsts pīdereibu, ari nūdrūsynojūt latgalīšu volūdys, literaturys i kulturviesturis pīredzis nūdūšonu cytom paaudzem, ir svareigi dabuot sistematisku finansiejumu latgalīšu rokstu volūdys vuiceišonai Latgolys školuos.

Itū iniciativu atbolsta ari Latgolys plānuošonys regiona vadeiba, i  tyvuokajā laikā ir plānuota tikšonuos ar septeņu Latgolys nūvodu i diveju vaļsts piļsātu vadeibu, izgleiteibys puorvaļžu i školu puorstuovim, kab vīnuotūs par latgalīšu rokstu volūdys vuiceišonu sevkurā nūvodā i vierzeitu vaicuojumu apsprīsšonai vaļdeibā par regulara finansiejuma pieškieršonu latgalīšu rokstu volūdys apgivei školā i stabila juos vuiceibu procesa nūdrūsynuošonai.

Aicynuojums Latgolys plānuošonys regiona nūvodu vadituojim, izgleiteibys puorvaļžu vadeituojim, školu direktorim i školuotuojim ITE. Īinteresātūs aicynoj da ituogods 31. augusta aizpiļdeit dasacejuma veidlopu ITE. Papyldu informaceja: lvlksa@inbox.lv ci ltgasoc@gmail.com; tel.: 26481524.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]