Lūznovā trešais Baltejis džeza festivals “Škiuņa džezs”

Lūznovā trešais Baltejis džeza festivals “Škiuņa džezs”

Rokstu sagataveja: portals lakuga.lv

Nu 25. da 28. augusta Rēzeknis nūvoda Lūznovys muižā trešū reizi nūtiks Baltejis džeza festivals “Škiuņa džezs”. Festivalā skanēs koncertprogramys ar Latvejis, Leitovys, Igaunejis, ASV i Francejis muziķu pīsadaleišonu, kai ari varēs nūviertēt 35 meistarklašu dalinīku snāgumu, informej Lūznovys muižys kulturys projektu vadeituoja Inga Žirgule.

Ituogods festivala programā skanēs na viņ Baltejis vaļstu, bet ari ASV i Francejis džeza muziķu i grupu sagataveitys koncertprogramys. 25. augustā festivalu atkluos Latgolys jaunī džeza muziki, kas ir izauguši i atsateistejuši reizē ar festivalu – Trio Lipskis/Justs/Arbidāns, partū jo eipaša prīca festivala reikuotuojim par apvīneibys pārnuo gods beiguos izdūtū debejis mini-albumu “Taids džezs”. Itūpavasar skaņdorbs “Oki, nalej, leiteņ” tyka īkļauts ari izlasē “Jazz in Latvia 2021”. Trio koncertā Lūznovā pīsavīnuos pianists Edgars Cīrulis i saksofonists Raimonds Petrovskis. 27. augustā festivala programā gostu dīna – ar franču folkdžeza programu Baltejis džeza festivalā “Škiuņa džezs” gasteis “David Chevallier Trio” nu Francejis, prezentejūt ituo gods martā izdūtuo albuma “Katram sava tautasdziesma” programu, skanēs Laura Amantova kvarteta i Rūtys Dūdumys-Ķirsis kūpprojekts, bet “The Ciel Experience” nu ASV skaniejumā sasaveis amerikaņu džeza tradiceju harmonejuos i improvizacejā sakņuotī R&B, svinga, hip-hop i tradicionaluos Haiti muzykys stili.

Sastdiņ, 28. augustā, dīnys programā varēs dzierdēt festivala meistarklašu ansambļu snāgumu, bet vokorā modernais i akademiskais džezs saplyuss lītuvīšu “Kęstutis Vaiginis Quartet” izpiļdejumā, kai ari igauņu i armeņu muziķu apvīneiba “Shabat Quartet”, kuru repertuarā sūpluok originaldorbim ir armeņu i ebreju folkmuzykys aranžejis. Par festivala nūslāguma programu jau tradicionali pasaryupēs Rēzeknis bigbends, kuram pīsavīnuos festivala meistarklašu vadeituoji – džeza dzīduotuoja Vita Rusaitytė (LT), sytaminstrumentalists Artis Orubs (LV), saksofonists Kęstutis Vaiginis (LT), džeza gitarists Jaan Janson (EE) i kontrabasists Ara Yaralyan (EE). Neiztryukstūša festivala sastuovdaļa byus ari ik vokora festivala džema sesijas, kuramuos kūpeigi muzicej i meistarklašu dalinīki, i pasnīdzieji.

Festivala mierkis palics namaineigs – veicynuot interesi par džeza muzyku, rūsynuot tūpūšūs i asūšūs džeza muziķu sadarbeibu, kai ari turpynuot izdzeivuot džeza muzykys prīcu Latgolā. Ari itūgod festivala meistarklasem beja aicynuoti dasasaceit džeza muzykys interesenti – muzykys školu i augstškolu studenti, tūpūšī muziki i cyti džeza entuziasti. Jom dasasaceja 35 interesenti nu Latvejis i Leitovys, sajamūt īspieju pylnveiduot profesionalū pīredzi pi pasnīdziejim nu Latvejis, Leitovys, Igaunejis i itūgod ari “The Ciel Experience” muzikim nu ASV – kontrabasa, džeza gitarys, basgitarys, saksofona i cytu pyušamūs instrumentu, tausteņinstrumentu spēlē i vokalā. Taipat vysuos meistarklasēs varēs apgiut improvizacejis i ansambļa saspēlis prasmis, kurys pīcu izveidūtūs ansambļu snāgumā varēs nūviertēt meistarklašu nūslāguma koncertā 28. augustā.

Ideja par džeza festivalu Lūznovys muižā suocēs 2018. gods septembrī, kod J. Ivanova Rēzeknis Muzykys vydsškolā tyka izveiduota Džeza muzykys nūdaļa, kurys vadeibu pasajēme džeza muzikis, komponists Toms Lipskis. Jam, suocūt dorbu Latgolā, roduos dūma par džeza festivala veiduošonu Lūznovā, tai pasajamūt ari tūpūšuo festivala muokslinīciskū vadeibu. 2018. gods vosorys nūslāgumā Lūznovys “Kulturys škiunī” div koncertprogramuos izskanēja džeza festivala īskaņu koncerts, īzeimejūt festivala laiku i vītu. Dīmžāļ rudenī Toms puoragri devēs myužeibā, bet, gūdynojūt īsuoktū dorbu i veļtejūt festivalu juo pīmiņai, ar devizi “Turpinājums!” 2019. gods augustā Lūznovys muižā nūtyka pyrmais Baltejis džeza festivals “Škiuņa džezs”. Festivala idejis i aizsuokumu degsmi turpynoj i jau trešū godu kūpā ar Lūznovys muižys komandu uztur festivala muokslinīciskais vadeituojs, trombonists, aktivs i pīredziejs džeza muzikis Lauris Amantovs. “Škiuņa džezs” ari itūgod byus turpynuojums īsuoktajom idejom, turpynuojums džeza muzykai Latgolā, turpynuojums pīredziejušūs džeza muziķu zynuošonu nūdūšonai jaunajim.

Koncertu beleti nūpierkami “Biļešu Paradīze” kasēs i škārsteiklā, vītu skaits koncertūs īrūbežuots, a džema sesejis apmaklātuojim ir bez moksys. Koncertus var apmeklēt ar dereigu Covid-19 izslymuošonys, vakcinacejis ci testiešonys sertifikatu. Sevkurs koncerta belets atseviški moksoj 4,00 eiro, tok daīmami ari div dīnu (27. i 28. augusts) īejis beleti, kas moksoj 15,00 eiro, i vīnys dīnys (27. ci 28. augusts) belets 8,00 eiro vierteibā. Vokoru džema seseju baudeišona ir bez moksys. Baltejis džeza festivala nūtikšonu Lūznovā itūgod atbolsta Rēzeknis nūvoda pošvaļdeiba, ASV viestnīceiba Latvejā i Francejis Instituts Latvejā, taipat atbaļsteituoju vydā ari “Latvijas Balzams” i “Rēzeknes Gaļas kombināts”. Papyldu informaceja par festivalu ITE.

Print Friendly, PDF & Email

Nūtikšonu kalendars

Aug
11
Cat
12:00 Aglyunys bazilikys svātki @ Aglyunys bazilika
Aglyunys bazilikys svātki @ Aglyunys bazilika
Aug 11 @ 12:00 – Aug 15 @ 20:00
Svātku programa Vyssvātuokuos Jaunovys Marejis Dabasūs uzjimšonys gūdam. 11. augusts 12.00 – Dīnys Svātuo Mise par sliminīkim pi Bazilikys duorza oltora. 19.00 – Vokora Svātuo Mise Dīvmuotis gūdam pi Bazilikys duorza oltora. 12. augusts 12.00[...]
14:00 Latgaliskais seminars “Atzolys” @ Rekovys vydsškola
Latgaliskais seminars “Atzolys” @ Rekovys vydsškola
Aug 11 @ 14:00 – Aug 14 @ 18:00
2022. gods augustā bīdreiba “LgSC” Bolvu nūvodā reikuos bezmoksys četru dīnu latgaliskū seminaru jaunīšim “Atzolys”, kurā varēs pīsadaleit 20 jaunīšu vacumā nu 16 da 25 godu, kab vuiceitūs latgalīšu rokstu volūdu, īpasazeitu ar myusdīnu Latgolys[...]
Aug
12
Pīk
12:00 Ludzai – 845 @ Ludza
Ludzai – 845 @ Ludza
Aug 12 @ 12:00 – Aug 13 @ 23:45
Ludzai - 845 @ Ludza
14:00 Keramikys cepļa kūršona @ Raiņa muzejs "Jasmuiža"
Keramikys cepļa kūršona @ Raiņa muzejs "Jasmuiža"
Aug 12 @ 14:00 – Aug 13 @ 13:00
Keramikys cepļa kūršona @ Raiņa muzejs "Jasmuiža"
15:00 Izstuodis “Atjaunotajam pieminek... @ Latgolys Kulturviesturis muzejs
Izstuodis “Atjaunotajam pieminek... @ Latgolys Kulturviesturis muzejs
Aug 12 @ 15:00 – 16:30
1939. goda 8. septembrī par tautys sazīduotim leidzeklim tyka atkluots vīns nu skaistuokajim pīmineklim Latvejā – “Vienoti Latvijai”, tautā saukts par Latgolys Muoru (meta autors Leons Tomašickis, tieļnīks Kārlis Jansons). Tys ir Rēzeknis i vysys[...]