Rokstu sagataveja: portals lakuga.lv

“Ausmeņa Records” repere Ūga aba Daiga Barkāne izdavuse jaunu dzīsmi ar nūsaukumu “Piārs”. Smeļdzeigajā dzīsmē sasavej gon Daigys reps, gon ari liriskuoki motivi.

Daiga poša pīzeist, ka dzīsme ir par cylvāku puordzeivuojumim. “Par īškejū suopi, tai saucamū nostu, nu kurys mes vysaidūs veidūs ceņšamēs tikt vaļā, par suopi, kurai izīmam cauri, lai sevi otkon nu jauna īmīļuotu. Nu molys tys izaver kai piārs, “nu i labi”. Pošim sevi lauzt, pošim sevi leimēt, pošim sevi īmīļuot,” dzīsmi raksturoj repere Ūga.

“Katastrofali skaists, bet na eipaši laimeigs stuosts par byutni, kas sovu dobu globoj aiz piāra pleivura. [Byutni], kas napīlaiž cylvākus tyvai, deļtam ka zyna, ka jī kūž,” ar dzīsmis stuostu doluos Ūga. “Otkol bēgt nu seve, izalikt, ka vyss kuorteibā, raktīs dorbūs, tuseņūs, cylvākūs, kuri īt i aizīt.”

Par bītu dzīsmei guoduojs Jezups. Ūga stuosta, ka nu suokuma dzīsmei atguoja melodeja, piec tam tikai bīts. “Itei dzīsme topa “plyka”, vīnkuorši golvā skaneja melodeja bez bīta. Piec tam paleigā jiemu Jezupa bītus, izalaseju, kurais lobuok pīstuov, tai i topa “Piārs”,” pīzeimoj repere. Dzīsmi miksēja rolands če.