Diskusejā apsprīss Latgolys atīmūšūs laikus i regiona izaicynuojumus

Diskusejā apsprīss Latgolys atīmūšūs laikus i regiona izaicynuojumus

Rokstu sagataveja: portals lakuga.lv

20. septembrī 12.00 stuņdēs “Facebook” tīšsaistē varēs nūsaklauseit diskuseju “Latgale pēc 100 gadiem – izmirusī zeme vai labklājības un miera osta”, kurā apsprīss Latgolys atīmūšūs laikus, izaicynuojumus, ar kurim sasaskar Latgolys īdzeivuotuoji, kai ari tū, kas ir juodora, lai Latgola byutu lobkluojeiga vīta, kurā dzeivuot i iz kuru atsagrīzt.

Diskusejā pīsadaleis četri runuotuoji – jaunīšu mentore i Rēzeknis dūmis deputate Leila Rasima, kas reizē ir ari diskusejis moderatore aba vadeituoja, marketinga guru i bloga 00000000.lv veiduotuojs Raimonds Platacis, Latvejis Socialuos uzjiemiejdarbeibys asociacejis vadeituoja Regita Zeiļa, sovu skotu nu molys pīduovuos sabīdryskūs attīceibu profesionaļs, “Draugiem Group” runysveirs Jānis Palkavnieks.

Sarunys mierkis ir izrunuot vizeju, kaida Latgola varātu byut piec 100 godim, jamūt vārā itūšaļt asūšūs stereotipus, nagativū statistiku, kas ar Latgolu teik saistāta. Taipoš apsprīsti tiks ari izaicynuojumi, ar kurim niu sasaskar nūvoda īdzeivuotuoji, kai ari tys, kaida lūma ir šudiņdīnys latgalīšam, lai atīmūšūs laiku latgalīts varātu dzeivuot drūsuoku i laimeiguoku dzeivi.

“Ar mani sasazynuoja Eberta fonda puorstuovs (laikam beja pamanejuši raidīrokstu “Ej šī! Parunuosim?”) i pīduovuoja sataiseit diskuseju itai platformai Latgolys kontekstā par Latgolai aktualū – uztycūt ari piļneigu breiveibu diskusejis tematikys izvēlē. Apsasprīžūt ar vairuokim cytim cylvākim, izalasejom plašuoku tematu – par nūteikūšū Latgolā, par tū, kai cylvāki tān dzeivoj, i par tū, kur īmam iz prīšku. Maņ redzīs, ka myusim Latgolā nav eisti skaidrys, iz kū mes īmam. Kaidu Latgolu gribim veiduot, kaidu jū gribim redzēt piec 12, 20, 100 godim? Pa munam, ir svareigi par itom lītom runuot, eipaši šaļtīs, kod ir krīzis i gryuši laiki,” par mudynuojumu veiduot diskuseju stuosta diskusejis moderatore i dalineica Leila Rasima.

“Mes gon Latgolā smejamēs, ka “Myusim, latgalīšim, krīze pi dyrsys!”, asam vīnkuorši pīroduši nūgaideit i sagaideit lobuokus laikus. Mes leidz golam naapsazynojom, ka ari mes poši veidojom i “programejom” vidi sev apleik, na tikai tī, kas lam augšā i īdola voi naīdola naudu. Par tū ari parunuosim – kas juodora šudiņdīnys latgalīšam, lai paleidzātu na tikai sev, bet ari atīmūšūs laiku latgalīšam – lai myusu mozmozbārni dzeivuotu lobuokā vītā, kuru asam mierktīceigi taidu taisejuši,” skaidroj Leila.

Diskusejis reikuotuojs ir navaļstiska organizaceja “Freidrich-Ebert-Stiftung Baltic States”, kas ir Vuocejis vacuokais politiskais fonds ar bogotom socialdemokratejis tradicejom. Fonda dorbs ir vārsts iz socialdemokratejis pamatidejom i vierteibom – breiveibu, taisneigumu i solidaritati.

Diskusejis tīšraidi varēs nūsavērt ITE.

Print Friendly, PDF & Email

Nūtikšonu kalendars

Jan
26
Tre
vysu dīnu Nūvodpietnīceibys lasejumi prāve... @ Bolvu Nūvoda muzejs, tīšsaiste
Nūvodpietnīceibys lasejumi prāve... @ Bolvu Nūvoda muzejs, tīšsaiste
Jan 26 vysu dīnu
Nūvodpietnīceibys lasejumi prāvesta Alberta Budžis pīmiņai @ Bolvu Nūvoda muzejs, tīšsaiste
Gūdynojūt prāvesta Alberta Budžis (1930–1957–2017) atceri, Bolvu Centraluo biblioteka aicynoj pietnīkus pīsadaleit “Novadpētniecības lasījumos prāvesta Alberta Budžes piemiņai”. Tēmu lūks nav īrūbežuots, jis ītvar sevkuru pietnīku interesejūšu jūmu, kurys izpietis teritoreja ir Bolvu nūvods. Lasejumu[...]
Jan
28
Pīk
19:00 Gruomotys “Mīlas kastings” muzyk... @ Babeitis Kulturizgleiteibys centrs
Gruomotys “Mīlas kastings” muzyk... @ Babeitis Kulturizgleiteibys centrs
Jan 28 @ 19:00 – 21:00
Gruomotys "Mīlas kastings" muzykaluo prezentaceja @ Babeitis Kulturizgleiteibys centrs
28. janvarī 19.00 Babeitis Kulturizgleiteibys centra lelajā zalē, Piņkūs, nūtiks rakstneicys Ilzis Aizsilys gruomotys “Mīlas kastings” muzykaluo prezentaceja.   Par latgalisku nūskaņu pasaryupēs: rakstneica Ilze Aizsila i improvizators Viesturs Vizulis; muzykys grupa “Dabasu Durovys”; videjuos[...]