Gruomotys “Burtu vuoceleite” attaiseišonys svātki
Rokstu sagataveja: portals lakuga.lv
25. septembrī 14.00 stuņdēs Viļānu Nūvodpietnīceibys muzejā nūtiks gruomotys latgalīšu rokstu volūdā “Burtu vuoceleite” (teksta autore Ineta Jugane-Atpile, muokslineica Ieva Širiņa) attaiseišonys svātki, kai ari muokslineicys I. Širinis gruomotys ilustraceju izstuodis atkluošona, informej Rēzeknis Tehnologeju akademejis Sabīdryskūs attīceibu nūdaļa.
Pasuokumā byus tikšonuos ar muokslineicu I. Širiņu, muzicēs grupa “Bez nosaukuma”, apmaklātuojim tiks duovynuotys gruomotys.
Ieva Širiņa i Ineta Atpile-Jugane ir RTA absolventis. I. Širinis magistra dorba projekts – gruomotys grafikys dizains – tyka papyldynuots ar dzejneicys I. Atpilis-Juganis sacarātom ailem, i rezultatā ir izdūta kruosaina losomgruomota latgalīšu rokstu volūdā, kura tiks duovynuota bibliotekom, školom, pyrmsškolys izgleiteibys īstuodem i RTA gostim.
Vysus interesentus laipni aicynoj pīsadaleit. Pasuokuma laikā lyugums īvāruot vaļstī nūsaceitūs epidemiologiskuos drūšeibys pasuokumus.
Izdavums sagataveits ar RTA Izgleiteibys, volūdu i dizaina fakultatis Regionalistikys zynuotniskuo instituta finansialū atbolstu. Projekts teik realizāts ar Latgolys regiona atteisteibys agenturys, Vaļsts kulturkapitala fonda i AS “Latvijas valsts meži” finansialū atbolstu.
