Rokstu sagataveja: portals lakuga.lv

9. oktobrī 18.00 stuņdēs Latgolys viestnīceibā GORS byus grupys “Dabasu Durovys” koncerts “Reits”. Piec grupys dalinīka Arņs Slobožanina stuosteituo, koncertā byus vareiba dzierdēt gon vacuokys, gon ari pavysam svaigys dzīsmis.  

Grupa “Dabasu Durovys” roduos 2006. goda suokumā Daugovpilī. “Dabasu Durovys” ir vīna nu pyrmūs i nadaudzūs grupu, kas izpylda rokmuziku latgaliski, kai ari ir izmontuojuse blūza i diksilenda elementus sovā repertuarā. Niu grupa iz skotivis ir jau 15 godus i leidz šam ir izdavuse pīcus studejis albumus – “Lepetnīks”, “Styklu vītā skaņa”, “Bāka”, “Pādys runoj” i “Perimetrs”. Taipoš grupa ir braukuse uzastuot ari uorpus Latvejis – Portugalē, Leitovā, Pūlejā, Australejā i cytur.

Par sajiutom pyrma koncerta Arņs stuosta: “Sajiutys ir lobys. Piec koncertim mes vysi asam sasailguojuši. Koncertu dzeive ir atsajaunuojuse, bet na taidā apmārā, kai grybātūs.” Koncerts byus divejuos daļuos, byus vysaidi gosti – Verners Martinovs aba Weron Martin, apvīneibys “Ausmeņa Records” repere Ūga aba Daiga Barkāne, grupys “Piparmētra” soliste Jana Dudare, kai ari grupa “Fak“nTurīs”.

Koncertā skanēs gon vysim labi zynamuo dzīsme “Piparmātru čajs ar madu”, gon ari “Suokums”, “Sejas grāmata”, “Tur”, “Puosuoka”, “Reits” i cytys. Taipat Arņs atkluoj, ka pyrma koncerta  klauseituojus īprīcynuos ar jaunu dzīsmi. Pavysam dreiži izīs ari videoklips dzīsmei “Leiču, Leiču”. Tys filmāts Viļanu bazneicā kūpā ar sīvīšu kuori “Medicus”. Dzīsmei “Leiču, leiču” izmontuoti latgalīšu literata i gruomatnīka Andryva Jūrdža vuordi.

Vaira informacejis par koncertu var skaiteit ITE.