Kulturys īsacejumi nedeļai Apjumeibu zeimē

Kulturys īsacejumi nedeļai Apjumeibu zeimē

Rokstu sagataveja: portals lakuga.lv

Ituos nedelis īsacejumi šudiņdīnys dzeivis jubilaris – školuotuojis, rūkdarbneicys, Latgolys etnografiskūs tārpu darynuotuojis i popularizātuojis Ivetys Seimanovys – ziņā. Juos šyupeļa svātki īkreit Apjumeibu laikā, partū Iveta pīduovoj izdzeivuot itū nūzeimeigū rūbežlaiku, prīcojūtīs par nūjimtū ražu, meditejūt pi dzīsmis “Cārmyukša”, īsadvasmojūt nu rudiņa kruosu Gaļānu (Vydsmuižys) parkā – tārpu meistaris dzymtajā vītā.

Apjumeibu lobumi

Septembra pādejuo nedeļa paīt Mikeļa dīnys, Apjumeibu zeimē. Itī godskuortu īražu svātki īzeimej rūbežu goda ritiejumā – aiztaisa durovys vosorai, attaisa vuortus iz zīmu. Nakts stuov vīnā garumā ar dīnu. Rudiņam pīstuov kruosu kūšums, pylns pogrobs ar lobumim, meditativys puordūmys, sylta čaja i adejumi nu vuškys vylnys vītejūs rokstūs.

Karteņa: Ivetys Seimanovys personiskais arhivs

Izej uorā, pasaver vysapleik, varbyut īraudzeisi kur Jumeiša zeimi. Varbyut jis sliepās zylajūs mikeleišūs, a voi cārmyukšā, kura teicās ar sorkonom ūgom. Salosit cārmyukšu ūgys, saīs eistyn gords cārmyukšu džems. Savuoriejs cārmyukšu zapts, izcep buļbu blīnu, lobuok – iz dzeivys guņs. Kaids sakars blīnim ar kulturu? Apjumeibuos – vystaisnuokais, partū ka tys ir myusu kulinarais montuojums.

Karteņa: Ivetys Seimanovys personiskais arhivs

Aņša Ataola Bierzeņa dzīsme “Cārmyukša”

Cikom losi cārmyukšys, pasaklausi Aņša Ataola Bierzeņa dzīsmi “Cārmyukša”. Maņ tei ir vīna nu meikuokūs. Moš i tev īs pi sirds.

Turku folklorys kūpys 40 godu jubilejis koncertā 2019. g. 3. augustā

Pastaiga Gaļānu (Vydsmuižys) parkā

Piec rudiņa navajag braukt da Siguldys, tys pats muokslinīks sakruosuojs Gaļānu parku. Apjumeibys ir ari dziļūs puordūmu laiks. Palosi R. Mūka puordūmys voi dzeju. Izstaigoj R. Mūka filozofejis stygu, īrūsmei kaids juo dzejūļs.

Mums nav lemts pazust no šī laika un telpas –
Tikai mainīties.
Pārvērsties tēlos, kuru viela
Ir rada sapnim un dziļāka par īstenību.
Starp sapņiem un īstenību mums ir jāatrod Sava vieta –
tas “klusais punkts”, kas nav
Tikai pieturas punkts, bet – atvēzēšanās.
Kā zemes lodes atvēzēšanās,
nepārprotams lēmums
Griezties ap savu asi.

Parkā atrassi symtim tūņu kruosuos i skaņuos. Voi atguodoj, kai smuordoj sakrytušuos lopys? Paej gobolu iz prīšku, īraudzeisi, kai vacajā gūdeibā Vydsmuižys muiža snauž. Vari nūsavērt tikū izguojušū muižys vizualizacejis video ITE.

Kalenders

Jul
15
Ūtr
19:00 Leivuona piļsātys svātki @ Leivuons
Leivuona piļsātys svātki @ Leivuons
Jul 15 @ 19:00 – Jul 19 @ 23:45
Ar pylnu svātku programu var īpasazeit ITE.
Jul
17
Cat
19:00 Izruode “Mazpiļsāta” @ "Ulbrokas pērle"
Izruode “Mazpiļsāta” @ "Ulbrokas pērle"
Jul 17 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]
Jul
18
Pīk
all-day Vikys Ekstys izstuode “Bēres Slo... @ galereja "Alma"
Vikys Ekstys izstuode “Bēres Slo... @ galereja "Alma"
Jul 18 all-day
Galerejā “Alma” byus apsaverama Reigys Fotografejis bienalis “Next 2025” programā īkļautuo Vikys Ekstys personalizstuode “Bēres Slobodā”. Izstuodis kuratore ir Astrīda Riņke. Dokumentalū video par ituos izstuodis dorbu kopiešonys procesu analogajā foto laboratorejā taisejs Kristians Fukss. [...]