Rokstu sagataveja: portals lakuga.lv

Postfolklorys grupys “Rikši” dalinīks Mārcis Lipskis i grupys “Dabasu durovys” dalinīks Arņs Slobožanins pīduovoj nūsaklauseit kūpeigim spākim radeitū dzīsmi “Dīna bez gola”, kai ari apsavērt dzīsmis video.

Mārcis stuosta, ka dzīsme ir tituldzīsme stuostu serejai par latgalīšu muziķu pīredzi i pīdzeivuotū pandemejis laikā. Vysi muziķu stuosti tiks apvīnuoti ari EP albumā “Dīna bez gola”.

“Ar Arni rodūši sasadorbuot ir vīglai, deļtam ka jam ir plaša fantazeja, kurā regulari dzymst idejis. Muzykai itaidi apstuokli ir pateiceigi,” par sadarbeibu ar grupys “Dabasu durovys” solistu stuosta Mārcis. Arņs ir ari dzīsmis autors, īrokstā spēlej gitaru i dzīd, Mārcis spēlej basu, mandolinu, kai ari pīsavīnoj dzīdojūt i veidojūt aranžejumu.

“Dīna bez gola” videoklipā pi sytaminstrumentu var redzēt ari vēļ vīnu postfolklorys grupys “Rikši” dalinīku Jurgi Lipski, veļ video pīsadola Pīters Daugulis ar blokflautys spēli, Deniss Smirnovs ar trompetis spēli. Dzīsmi īraksteja i miksēja Einārs Lipskis, māstera autors ir Kaspars Ansons, tok dzīsmis video filmēja Ivars Utināns.