Roksta autors: portals lakuga.lv

8. oktobrī 10.00–14.00 stuņdēs Rēzeknis nūvoda Audriņu pogosta Seiļūs, Valerijis Seilis dzymtajā vītā, teik organizāta sakūpšonys tolka. Interesenti var atbraukt ar sovu transportu i pīsadaleit ar sovim dorbareikim.

Tolkys organizatore, Audriņu pogosta kulturys noma vadeituoja Tamāra Smirnova stuosta: “Mes, kulturys noma cylvāki, asam izdūmuojuši, ka na viņ pavasarūs, bet ari rudiņūs ir juosakuortoj Valerejis Seilis pīminis vīta. Mes, četri pīci cylvāki, nūbrauksim iz Seilim. Nūkassim lopys, puorstateisim kompaktuok pučis i sataiseisim lobuoku puču dūbi pi krysta. Cylvāki ir suokuši vairuok slymuot, partū mes naaicynojam braukt tolcuonus vīnā pogosta buseņā. Lopu, kū kast gona, ka kaidam gribīs atbraukt i paleidzēt, var tū dareit ar sovu mašynu, pajamūt leidza sovus dorbareikus. Nūruode nu leluo ceļa iz Seilim ir, leidz pīminis vītai ceļš saremontāts, cik tys beja pogosta īspiejuos.

Es naasu vītejuo, juosoka – vīnu breidi itei Seilis vīta beja pat damiersta. Partū itūpavasar jū sakuortuojom, uzrokstam burteņus nūteirejom, jubilejis dīnā pyrms Juoņu pučis nūlykom pi pārņ atjaunuotuo krysta. Tū dareisim iz prīšku.”