Rokstu sagataveja: portals lakuga.lv

Da 27. oktobra Bolvu Centraluo biblioteka interesentus aicynoj dasasaceit, rokstūt iz sarmite@balvurcb.lv, tīšsaistis bibliotekarajai stuņdei 29. oktobrī 16.00 stuņdēs, kas veļteita feletonista Pītera Kuļša i juo davuma pīmiņai.

Tīšsaistis bibliotekaruos stuņdis laikā byus vareiba izzynuot voi atkuortuot, kas ir feletons, i īpazeit nūvadnīku Pīteri Kuļšu (1886–1941), kura dzymtuo puse ir Bolvu nūvoda Styglovys cīms agruok Baļtinovys, tān Škilbānu pogostā. Tīšsaistis pasuokuma daleibnīki tiks īpazeistynuoti ar Bolvu Centraluos bibliotekys veiduotū digitalū kolekceju “Feļetonists Pēteris Kulšs (Cērpiņu Blauzga) un viņa daiļrade”.

Sovus literarūs saceriejumus Pīters Kuļšs parakstejs ar pseidonimu Cērpiņu Blauzga. Nūzeimeiguokais dorbs ir 1936. godā laikrokstā “Jaunais Vōrds” publicātuo viesturiskuo teika “Mārgu sola”, kurā izmontuoti dzymtajā pusē nūklauseitī nūstuosti. Cērpiņu Blauzga rakstejs politiskus feletonus, kurymūs stuostejs par politiķu i Saeimys deputatu vuojeibom. Daudzi nu juo saraksteitajim feletonim ir aktuali ari šudiņ. Tuo laika presis izdavumūs publicāts ap 200 feletonu, a literarais montuojums nav apkūpuots gruomotā.