Rudiņa baudeituojus aicynoj Filandmuižys Zyluo akmiņa dobys styga

Rudiņa baudeituojus aicynoj Filandmuižys Zyluo akmiņa dobys styga

Rokstu sagataveja: portals lakuga.lv

Ludzys nūvodā da šam guojiejim jau ir sataiseiti 15 eisuoki i garuoki maršruti (1,3–29 km), tyvuokajā laikā tiks pīduovuoti vēļ diveji. Paguojušajā nedēļā tyka lobīkuortuota Filandmuižys Zyluo akmiņa dobys styga, informej Ludzys nūvoda pošvaļdeibys turisma organizatore Inga Zagorska.

Ludzys TIC puorstuovi kūpā ar a/s “Latvijas valsts meži” Zīmeļlatgolys regiona meža apsaimnīkuošonys plānuošonys vadeituoju Daini Rudzīti dobys stygu apsekuoja, atbreivuoja nu krytušūs kūku i zoru, nūmarkēja ar dzaltonys kruosys nūruodem. Nu krytušūs kūku izveiduoti treis vīnkuorša tipa sūleni, kab stygys apmaklātuojim byutu vareiba atsapyust i nūbaudeit leidza pajimtū čaju.

Karteņa: Inga Zagorska

Kūpejais stygys garums vīnā vierzīnī ir 1,3 km i jei vad pa skaistu i reļjefainu vidīni. Iz prīšku stygys suokumā ir plānuots pastateit planšeti ar informaceju par stygu i dižakmini, tivejuos apleicīnis objektim. Savutīs ūtra planšete tiks pastateita pi poša Filandmuižys Zyluo akmiņa, atkluojūt juo dobys nūzeimi. Itys dižakmiņs izaceļ ar sovpateigi zylgonū nūkruosu. Apleicīnē, kur beja daudz Ludzys igauņu cīmu i kura ir ainaviski skaista sova kolnainuo reļjefa deļ, ceļš nu Nirinim iz Filandmuižu guoja garum akmiņam. Dzierdāti daudzu vītejūs īdzeivuotuoju stuosti par atpyutu pi ituo dižakmiņa. Teik dūmuots ari veiduot ituos stygys vairuokus papyldu pastaigu variantus, cīš carūt iz veiksmeigu sadarbeibu ar zemu eipašnīkim.

Karteņa: Inga Zagorska

Pārnejā zīmā Vaļsts mežu apsaimnīkuotuoja a/s “Latvijas valsts meži” Zīmeļlatgolys regiona plānuotuojs Aivars Paulins, veicūt dorba pīnuokumus Ludzys nūvoda Pyldys pogostā, atkluojs da šam vēļ napamaneitu dižakmini. Atrostuo akmiņa vierszemis tylpums ir pi 11 kvadratmetru, kas atbylst dižakmiņa kriterejim i ir aizsorgojams dobys pīmineklis. Aicynojam dobys objekta apmaklātuojus saudzēt dobys vierteibys i naatstuot aiz seve atkrytumus.

Filandmuižys dobys stygys maršrutu, kai ari cytus aktivuos atpyutys maršrutus var atrast Ludzys TIC vītnē sataiseitajā kartē.

Print Friendly, PDF & Email

Nūtikšonu kalendars

May
20
Pīk
19:00 Artura Skuteļa lelkoncerts “Jā” @ koncertzale "Palladium"
Artura Skuteļa lelkoncerts “Jā” @ koncertzale "Palladium"
May 20 @ 19:00 – 22:00
20. majā Reigā, koncertzalē “Palladium” nūtiks latvīšu hip-hopa muzika Artura Skuteļa lelkoncerts i jaunuo albuma “Jā” prezentaceja. Kai lelkoncerta eipašuo gaška ar sovu soloprogramu iz skotuvis kuops ari latgalīšu repere Ūga, kuruos 2020. godā izdūtais[...]