Kulturys īsacejumi nedeļai: tuškavuoti kuopusti, poezeja i kūki

Kulturys īsacejumi nedeļai: tuškavuoti kuopusti, poezeja i kūki

Rokstu sagataveja: portals lakuga.lv

Valentinam Lukaševičam i Aleksandram Čakam dzimšonys dīna ir vīnā datumā. Nasaverūt, ka jī nav laikabīdri, jūs obejus literaturzynuotnīki pīzeist par urbanistim. Vaļukam obeju kūpejuo dzimšonys dīna vīnkuorši pateik. I vyss. I cytys vīnkuoršys lītys, kas juo īsacejumūs, ari pateik. Saceisit – kas tī eipašs? A tai i par dzeivi var pasaceit. Jei tok ari vīnkuorša līta. Partū itūnedeļ vīnkuorši dzeivojam, i sveicīni Vaļukam dzimšonys dīnā.  

Tuškavuoti kuopusti

Kotram cylvākam ir iz vīnys ci divu rūku pierstim skaitomi datumi, kuri spylgti palīk īguoduos. Tī nav ni Juoni, ni Jaunais gods, kurus svietej vysi, a nazkas individuals. Vyscieškuok tuos ir poša ci tyvu vylvāku dzimšonys dīnys. Es pīdzymu 27. oktobrī. Iz munu dzimšonys dīnu beja pyrmī skuobātī kuopūsti i pādejuos sieņs.

Tuškavuoti kuopusti beja iz gostu golda. Pošu izaudzāti, sašynkavuoti, miļzeigā emaljātā kastrulī ar dieleiti i akmini nūspīsti. Aicynoju itū nedeļ sātā paēst satuškavuotus kuopūstus! Mama vuorēja kūpā ar sardeļkom, bet var ari posnus. Var piečuok iz skaurodys kriejumā pacapynuot. Var vysaiži!

Sutynojās kuopusti. Karteņa: Valentins Lukaševičs

Kuopūstūs, ari stuņdi sutynuotūs, ir cīši daudz C vitamina. I myusu seņči, i jiurys braucieji gluobēs ar kuopustim! Tānejā situacejā – pošā laikā!

Ar poezejis gruomotu vokorā

A kaidu vokor var palaseit aba paskaiteit poezeju. Jai pīstuov vokori. I ni kaidu romanu voi stuostu, a taišni poezeju. Īsim tū pošu galejū, tū pošu ekstremalū ceļu.

Poezeja kai puoreja pa slīdem. Dīnests puoreja pi stacejis Rēzekne II. Karteņa: Valentins Lukaševičs

Apsasēd iz divana, klusumā, ar gruomotu rūkā. Ka nav, atrūņ i skaiti telefonā. Kū? A vysleidza kaidu poezeju! Es ar sovu gaumi taipoš natruopeišu jiusu gaumē! A poezeja vysa ir godna – te tei smukuokuo volūda, kaida viņ pasaulī ir! Te vyss koncentrāti i tālaini. Te nūskanis i dūmys! Te jauni vuordi i jaunys vuordu nūzeimis! Te volūda juos vysūs augstumūs!

Gostūs pi kūkim

Ir godā divys reizis, kod  dobā nūteik dyžonys puormainis. Šudiņ vēļ zorā lopu nabeja, a piec trejom dīnom salateigys lapenis. Vakar lopa beja zaļa, a šudiņ maleņa jau oranža! Tuos ir kaidys div treis nedelis pavasarī i rudinī, kod vyss mainuos pa dīnom. Itū laiku navajag prolaist, pagaisynuot! Vēļ var paspēt – iz pādejū raundu! Navajag nikur tuoli īt ci braukt. Mes nadzeivojam tuksnesī voi tundrā, kūku pi myusim vysur ir daudz. Aicynoju kotru nedelis dīnu viereigi apsavēr tiuļuokūs kūkus. Kurs aug pi garažys. Kurs aug trotuara vydā i cytur. Šudiņ zorā vēļ ir treis lopys, bet voi juos byus reit, kod īšu garom?

Karteņa: Valentina Lukaševiča personiskais arhivs
Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]