Nūtiks vierīneigs tīšraidis pasuokums “Latgales diena”
Rokstu sagataveja: portals lakuga.lv
10. novembrī Latgolys plānuošonys regions 15.00–18.00 stuņdēs reikoj īdvasmojūšu tīšraidis pasuokumu “Latgales diena”, kas nūtiks nu Latgolys viestnīceibys “Gors” ar retranslaceju “Delfi Live” i Latgolys plānuošonys regiona“Facebook” lopā, informej Latgolys plānuošonys regiona projektu asistente Arnita Aleksejeva.
“Latgales diena” ir pasuokums, kas veļteits Latgolys regiona uzjiemiejdarbeibys aktiviziešonai i atteisteibai, Latgolys puorstuovnīceibys darbeibys populariziešonai, kai ari vītejūs uzjiemieju pīduovuotūs īspieju i Latgolys kai turisma golamierķa prezentiešonai.
10. novembrī “Latgales dienas” apmaklātuojus virtualā ceļuojumā ar humoru vess pazeistamais latgalīšu influencers Lauris Zalāns i šarmantuo pasuokuma vadeituoja Diāna Zirniņa, ar video prezentaceju paleidzeibu izstuostūt stuostus par vairuok nakai 40 vītejim uzjiemiejim, sātys ražuotuojim i amatnīkim, veidojūt interesantys reportažys nu turisma i uzjiemiejdarbeibys vītom Latgolā, kai ari atkluojūt uzjiemieju veiksmis stuostu formulys. Tīšraidis pasuokuma laikā skateituojus prīcēs popularu muokslinīku uzastuošona, uzjiemieju paraugdemonstriejumi i saistūšys meistarklasis. Pasuokums nūsaslēgs ar Latgolys uzjiemiejdarbeibys centra reikuotuo konkursa “Latgales reģiona uzņēmēju gada balva 2021” uzvarātuoju gūdynuošonu.
Apcīmoj Latgolu virtuali – atkluoj unikalys atpyutys vītys, eipašus lauku lobumus i lobsajiutys pīduovuojumus, īraugi izaugsmis īspiejis biznesam i plānoj naaizmierstamus pīdzeivuojumus Latgolā kūpā ar saimi!
Pasuokums teik reikuots Eiropys Ekonomikys zonys finanšu instrumenta 2014.–2021. goda perioda programys “Vietējā attīstība, nabadzības mazināšana un kultūras sadarbība” atbaļsteitajā projektā ”Uzņēmējdarbības atbalsta pasākumi Latgales plānošanas reģionā”. Pasuokums tiks organizāts atbylstūši aktualajim epidemiologiskuos drūšeibys pasuokumim Covid-19 infekcejis izplateibys īrūbežuošonai.
Reikuotuoji aicynoj sekuot leidza aktualai informacejai par “Latgales dienas” nūtikšonu Latgolys plānuošonys regiona škārsteikla vītnē i projekta “Facebook” lopā.
