Hiphopa izpiļdeituojim Ūgai, Bruolānam i Alfyman sadarbeiba dzīsmē “Gravitācija netur”

Hiphopa izpiļdeituojim Ūgai, Bruolānam i Alfyman sadarbeiba dzīsmē “Gravitācija netur”

Roksta  autors: portals lakuga.lv

Latgalīšu reperim Ūgai i Bruolānam, sasadorbojūt ar bruocānīti Alfyman, topuse jauna dzīsme “Gravitācija netur”, kas īkļauta ari repera Alfyman jaunajā albumā “Dzīves sodrēji”.

Alfyman ar muzyku nūsadroboj jau ilgi – 15 godu, jis stuosta: “Vysa itei muzykys līta, eipaši repa muzyka mani uzrunoj jau nu pamatškolys laiku, jau byus kaidi 15 godi, kūpš ar tū nūsadorboju pats. Tys maņ vaira taidā kai hobeja leiminī. Stuosts ir par leidzeigi dūmojūšūs satikšonu, koč kuo radeišonu, jaunu lītu īsavuiceišonu.”

Alfyman cielīs nu Bruocānu i ir ari daļa nu grupys “101 kilometrs”: “Sastuovs vairuoku godu laikā ir mainejūs, tok kūduls, kas ir es i Emīls, vys vēļ dorbojās. Brocāni viesturiski teik skaitāti par 101. kilometru, deļtam ari myusu apvīneibai taids nūsaukums. Nazkod senejūs laikūs beja lykums, ka īslūdzātī navarēja dzeivuot tyvuok par 101 kilometru leidz golvyspiļsātai, Bruocāni beja tyvuokuo vīta.” Itaida īrūbežojuma mierkis beja izslēgt nu sabīdreibys padūmu īkuortai navālamūs cylvākus, deļtam Padūmu Savīneibā roduos apdzeivuotys vītys 101 km attuolumā nu padūmu republiku golvyspiļsātu, tī dzeivuoja cylvāki ar itū īrūbežojumu.”

“Niu turpynojās dorbs pi īrokstu studejā. Kod tys byus pabeigts, varēs dzierdēt ari vaira jaunumu nu “101 kilometrs”,” stuosta Alfyman, kas gribēja palikt atpazeistams viņ ar pseidonimu. “Parkū taišni repa muzyka mani ir “pavylkuse”? Gryuši saprast pošam. Nu suokuma klausiejūs “Korn”, “Limp Bizkit”, piec tuo “Cypress Hill” mani pīvērse nadaudz cytam žanram. Kod dzierdieju, ka latvīšu čali “skolda” normalu repu, saprotu, ka pats ari tai grybu. Īsuokumam beja daži “freestyle”, demo versejis, bet ar laiku tys aizguoja nūpītnuok.”

“Mes ar Alfyman sasatykom “svātajā” soundcloud.com. Es publicieju albumu, jis mātuoja “šautautus”, ka maņ labi saguojs. Jau agruok īvāruoju juo i hiphopa apvīneibys “101 kilometrs” darbeibu, tys taids malnuokais “underground” Latvejā. Es jam pīraksteju, lai brauc gostūs – saraksteisim “treku”. Tai saguoja, ka jis atbrauce i rezultatā saguoja “treks” par jauneibys maksimalismu”, par sadarbeibu ar muokslinīku stuosta “Ausmeņa Records” repere Ūga.

Alfyman atkluoj: “Bruolānu i Ūgu pamaneju, kod Ūgai izguoja albums. Pasaklauseju ari puorejūs muokslinīkus nu “MKH41” i “Ausmeņa Records”, sadzierdieju eistū nūskaņu. Pīsaisteja bīti i izpiļdejums. Piec tam suocem runuot vuordu pa vuordam, cikom saprotom, ka vajag kūpā uzrepuot. Maņ ari simpatizej latgalīšu volūda, tei tikai paruoda latvīšu volūdys daudzveideibu i skaistumu. DJ Valns iztaiseja bītu, īraksteju demo i devūs gostūs pi Jezupa. Varams, ka iz prīšku varēs dzierdēt vēļ kaidu kūpdorbu. Daudz kas pa itū laiku ir nūtics, nūteikti, ka tys byus kas interesants.

I vyspuor – beju pateikamai puorsteigts par tū, cik draudzeigai i laipnai mani uzjēme Rēzeknē. Īsapazynu ar Latvejis hiphopa izpiļdeituojim nu ūtrys Latvejis pusis i asu par tū prīceigs. Caru iz dreizu otkonsasatikšonu.”

“Saguoja interesanta storpnūvodu sadarbeiba. Dzīsmi īrakstejom 2020. gods vosorā pi Jezupa studejā. Dzīsmis ideja ir nu Alfyman, jam jau beja gotovs pants, kuru jis īskaiteja iz DJ Valns bīta. Mani uzrunuoja tema – dzeive iz naža asmiņa. Koč tān tys nav muns dzeivisveids, vysleidza ir, kū pastuosteit, deļtam ka guojs ir vysaiži,” atkluoj repers Bruolāns.

“Pa puora vokorim saraksteju sovu pantu, īrokstā pametem pyrmū mieginuojumu, kas maņ ir ratums, parostai kaidus treis četrus īrokstom, cikom dabojom eistū skaniejumu. Alfyman sovu daļu īraksteja gona dreiži, Ūga sovu pīdzīduojumu izdūmuoja iz vītys, pantu īraksteja cytā reizē,” dzīsmis tapšonys procesu raksturoj Bruolāns. “Tod atlyka dorbs Jezupam, beja juosamiksej gobols, lai skaņ tai, kai vajag. Niu sagaidejom tū breidi, kod ir izguojs albums i varim tū nūsaklauseit gon “YouTube”, gon “Spotify”, ari cytuos straumiešonys vītnēs.”

I dzīsmi “Gravitācija netur”,  i Alfyman jaunū albumu “Dzīves sodrēji”, kas izguojs ituo gods 20. oktobrī, var nūsaklauseit zamuok.

Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]