Voi uzleime “Latgalīšu volūdai draudzeiga vīta” uzrunoj lītuot latgalīšu volūdu?

Voi uzleime “Latgalīšu volūdai draudzeiga vīta” uzrunoj lītuot latgalīšu volūdu?

Roksta autore: Sandra Ūdre, portals lakuga.lv

2020. gods 21. februarī, Storptautyskajā Dzymtuos volūdys dīnā, portals lakuga.lv īsuoce akceju “Latgalīšu volūdai draudzeiga vīta”, aicynojūt sajimt eipaša dizaina uzleimi. Niu portala skaiteituojim pavaicuojom: voi itei uzleime, jū īraugūt, uzrunoj itamā vītā lītuot latgalīšu volūdu, raugūt saprast itaidys iniciativys nūzeimi.

Uzleime raisa pozitivys emocejis

Voi nav gadejīs pīdzeivuot situaceju, kod nazyni, kai sabīdryskā vītā suokt sarunu – latgaliski voi latvīšu literarā volūdā? Tuos šuorbys viņ deļ tuo, ka reiz kaids iz sveicynuojumu latgaliski nav reagiejs lobvieleigi. Var ari saceit, ka tei viņ psihologiska problema. Parkū jū narysynuot ari pīlīkūt pi īejis durovu nauzkreitūšu zeimi, ka te var runuot tai, kai ar sovim paziņom i draugim.

Portalam suocūt, tūlaik redaktoris Vinetys Vilcānis vadeibā, itū akceju ITE, socialajūs teiklūs cylvāki paude pozitivys emocejis – komentarūs pi ituos viests lyka sovu dzeivūkļu i sātu fotografejis. Tai jī aplīcynuoja, ka vysu pyrma latgalīšu volūdai draudzeiguo vīta ir poša sāta i ir labi, ka daleji sātys sajiutys komfortā var palikt, ari runojūt sovā mēlē. Prūtams, tai pasaplašynoj ari latgalīšu volūdys lītuojums.

Pusūtru godu piec akcejis suokšonys portals  sovim skaiteituojim socialajūs teiklūs aizdeve itaidu vaicuojumu: voi itei uzleime, jū īraugūt, uzrunoj tevi itamā vītā lītuot latgalīšu volūdu? Sajēmem apstyprynuojumu, ka jāga itei uzleimei ir. Apkūpojūt atbiļdis nu socialajūs teiklūs (Facebook, Twitter i Instagram) aizdūtuo vaicuojuma “nui” atbiļdis beja 90 % gadīņu, “nā” 10 % gadīņu.

Uzleime vairuok klientu gon nagarantej

Kur atrūnamys vītys ar uzleimi “Latgalīšu volūdai draudzeiga vīta”, var apsavērt kartē. Prūtams, leluokais jūs skaits – Latgolā, vairuokys atrūnamys ari Reigā, tok ir ari Pūlejā i ASV. Ka kaidam ari gribīs taidu uzleimi iz sova uzjāmuma voi īstuodis durovu, var drūsai sasazynuot ar portalu lakuga.lv.

Itys Covid-19 vysaidūs īrūbežuojumu laiks nabeja draudzeigs uzleimei, svareiguoka iz durovu izaruodeja informaceja, ka juoīvaroj 2 m, juolītoj maskys voi vyspuor apkolpoj klientus attuolynuoti. Partū ari tī struodojušajim ir gryuši nūformulēt, voi taida uzleime ir kū daudz mainejuse saziņā ar apmaklātuojim voi klientim.

Laukūs, kur vīns ūtru labi pazeist, cylvāki bez uzleimis iz pogosta puorvaļdis ci veikala durovu runoj latgaliski. Partū uzrunuoju piļsātys vidē struodojūšūs. Manis uzrunuotajim uzjiemiejim voi nu vyspuor nabeja vīdūkļa par uzleimi i jī nikuo nagribēja komentēt, voi ari pīzyna, ka nav pamanejuši latgalīšu volūdai draudzeiguos vītys aplīcynuojuma kaidu ītekmi. Tai Agris Bitāns itū uzleimi beja dalics pi sova zvārynuotu advokatu biroja “Eversheds Sutherland Bitāns” durovu, jis soka: “Dīmžāļ pagaidom tikai deļ uzleimis nivīns nav suocs runuot latgaliski. Bet ari Covid-19 īrūbežojumu deļ biroja apomekliejumi bejuši rati.”

Latgalīšu volūdai nadraudzeigu vītu nadreikst byut

Daudz agruok pyrma portala akcejis vysim e-postus ar karūdzeņu “Latgalīšu volūdai draudzeiga vīta” syuta niulenejais Latgalīšu kulturys bīdreibys vadeituojs Jurs Viļums, par tū jis soka: “Tys karūdzeņš sataiseits laikam jau 2009. godā. Tūlaik maņ beja taidys uzleimis. I tod laikam piec kaida laika dalyku ari tū kai karūdzeņu pi paroksta “…@gmail.com” sistemā.

Voi tys kai eipaši veicynoj cylvāku raksteišonu latgaliski – pat nazynu. Pījamu, ka maņ jau tai vairums roksta latgaliski, deļtuo ka es jim parostai rokstu latgaliski. Tok cytu reizi rokstu kaidam ari lejislatvīšu volūdā i tod gon tys karūdzeņš ir kai taids atguodynuojums – nu kurīnis asu i ka, prūtama līta, kotrys var maņ e-postā latgaliski raksteit, varim latgaliski runuot. Storp cytu, vīna īriedne – jau napīmiņu nu kurys īstuodis –  eistyn ar mani suoce runuot latgaliski. Nazynu gon, voi tys e-posta deļ voi tai pat atpazyna. I sevkurs, sateikūt mani kluotinē, ari drūsai var runuot latgaliski.

Vysbeidzūt – ari tamā vītā, kur muna e-viestule teik attaiseita izlaseišonai, tī tok ari nūteikti ir “latgalīšu volūdai draudzeiga vīta”. Ka taida jau ir, vajag tik suokt runuot.

Latgalīšu volūdai nadraudzeigu vītu Latvejā nav. Taidu vīnkuorši nadreikst byut.”

Tai nu juosacynoj, ka uzleimei nav izškirūša lūma – runuot voi narunuot latgaliski. A jei aplīcynoj i veicynoj vairuok pozitivu auru ap latgalīšu volūdu, tys ari nav moz.

Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]