Bruolāns izdūd pyrmū singlu “Cīņa” nu albuma “Bagāža”
Roksta autors: portals lakuga.lv
Hiphopa apvīneibys “MKH41” dalinīks Bruolāns klauseituojim pīduovoj singlu “Cīņa” – pyrmū nu juo jaunuo albuma “Bagāža”. Dzīsme tyka īraksteita sadarbeibā ar vēļ vīnu “MKH41” dalinīku i bītmeikeru Jezupu.
Kai stuosta Bruolāns, dzīsme topa malnuo perioda laikā. “Dzeivē nūtyka na tī pateikamuokī nūtykumi. Atrodu Jezupa bītu mapē atbylstūšys nūskanis variantu i suoču raksteit pyrmū pantu. Ilgi raksteju vuordus, gribieju labi nūstruoduot dzīsmi, kai i vysu albumu,” atzeist muokslinīks. “Dzīsmē “Cīņa” es stuostu par pretrunom sevī, par tū, kai raugu tikt ar jom golā, kai kreitu i otkon ceļūs.”
“Īroksts nūtyka pi Jezupa studejā, gona dreiži, cik pīmiņu. Beju nūsleipiejs tekstu i nabeja lelu aizakeršonu. Ar Jezupu labi sasaprūtam, myusim ir leidzeigs redziejums par tū, kai albumam vajadzātu skanēt,” īraksteišonys procesu raksturoj Bruolāns.
Bruolāna albumā “Bagāža” varēs dzierdēt tikai juo pantus i Jezupa bītus. “Tys byus par mani, par puordzeivuotajom sajiutom. Ir dūma pyrma albuma izlaist vēļ dažus singlus video formatā. Albuma īrokstu stadeja ir finiša taisnē, tod byus dorbs Jezupam – juosleipej skaņa. Albumu “Bagāža” gribim izdūt ari CD formatā,” par īplānuotū stuosta Bruolāns.
Dzīsmi “Cīņa” vari nūsaklauseit zamuok.
