Uora galerejā Daugovpilī apsaverama Lilijis Zeilis personalizstuode “Nejaušība – dabiska kārtība”

Uora galerejā Daugovpilī apsaverama Lilijis Zeilis personalizstuode “Nejaušība – dabiska kārtība”

Rokstu sagataveja: portals lakuga.lv

Nu 3. novembra stykla galerejā “4METRI” Daugovpiļs cītūksnī, Hospitaļa īlā 8, apsavieršonai daīmama Lilijis Zeilis personalizstuode “Nejaušība – dabiska kārtība”, informej Daugovpiļs Marka Rotko muokslys centra marketinga specialists Aivars Baranovskis.

Laikā, kod jau otkon ir īrūbežuota puļciešonuos īšktelpuos, a tymsī vokori palykuši daudz garuoki, Latvejis Laikmeteiguos keramikys centrs sadarbeibā ar Daugovpiļs Marka Rotko muokslys centru apsavieršonai nūdūd vysim daīmamu, uora galerejā eksponātu izstuodi, kurai dorbus radejuse daugovpilīte Lilija Zeiļa.

Lilija Zeiļa – pūdneica, keramike, muokslineica. Dzymuse 1958. godā Daugovpilī. Muols i keramika muokslineicai ir dzeivisveids, kas veidoj juos kasdīnu i pasadūd meistaris grybai. Interese par keramiku Lilijai pasaruodeja jau školys godūs piec slovonuo Latgolys pūdnīka Stanislava Vilcāna darbneicys apmekliejuma. Pabeiguse Rēzeknis Lītiškuos muokslys vydsškolu, 80. godu suokumā jei aktivi īsasaisteja jaunizveiduotuo Daugovpiļs keramiķu kolektiva radūšajā dzeivē. Izstuodēs pīsadola nu 1981. goda, tūstorp sareikuojuse ari vairuokys personalizstuodis Latvejā i uorvaļstīs. Nu 1996. gods voda Daugovpiļs keramiķu studeju “Latgale”. Lilija ir īdvasmuojuse i vadejuse vairuokus ar keramiku saisteitus storptautyskus projektus, a dorbs studejā ir padarejs juos veikumu radzamu Latvejis mārūgā, kai ari īpazeistynuojs ar Latgolys keramiku pasauļa auditoreju. Pošlaik muokslineica aktivi pīsadola izstuodēs i storptautyskūs keramikys simpozejūs, duovojūt sovu pīredzi naskaitomim uorvaļstu muokslinīkim, kuri apbreinoj juos dorbus, i lobu pruotu nūdūd sovys prasmis jaunajai keramiķu paaudzei.

Karteņa: publicitatis materiali

Muokslineicys plastiski veiduotajim keramikys objektim ir izteiksmeigi lūcejumi i dobys fakturu rūtuojumi, kurus paspylgtynoj plyustūši, tūņkuortuos malnpalāki, zylgoni i sarkoneigi zamglazuru i glazuru glaznuojumi, veidojūt dzilis, tyvu kai treisdimensionalys dobys ainovys ar poetisku nūskaņu. Muokslineicys virtuozais kruosu dasadyurīņs pastreipoj dorbu iluzorū najaušeibu, formalū ekspreseju i glaznīciskū jutekliskumu.

Izstuode “Nejaušība – dabiska kārtība” Daugovpiļs cītūksnī, Hospitaļa īlā 8, ir apsaverama vysu dīnnakti (prūtams, īvārojūt itūšaļt spākā asūšū komandantstuņdi). Jei topuse, pasateicūt Vaļsts kulturkapitala fonda atbolstam.

Print Friendly, PDF & Email

Nūtikšonu kalendars

Feb
4
Sai
vysu dīnu TLMS “Dzīpariņš” 45 darbeibys go... @ Latgolys Kulturviesturis muzejs
TLMS “Dzīpariņš” 45 darbeibys go... @ Latgolys Kulturviesturis muzejs
Feb 4 vysu dīnu
Jaunū izstuožu godu Latgolys Kulturviesturis muzejs īsuoc kūpā ar ilggadejū i vysod atsauceigū sadarbeibys partneri – Tautys lītiškuos muokslys studeju “Dzīpariņš”. Tei nūdybynuota jau 1978. godā i apvīnoj sevī vysaidu paaudžu rūkdarbneicys, kurys saista kūpeiga[...]