Kulturys īsacejumi nedeļai Luočplieša dīnys zeimē: cīši sirdī turi Latveju!
Rokstu sagataveja: portals lakuga.lv
“Ir daudz īspieju, kai svinēt Latvejis vaļsts svātkus – Luočplieša dīnu i tai sekojūšū Latvejis Republikys Proklamiešonys dīnu 18. novembrī. Ari itamūs apstuokļūs, kod plaši pasuokumi i puļciešonuos ir līgta,” soka Zemissardzis 3. Latgolys brigadis komanders pulkveds Gunārs Vizulis. Luočplieša dīnys nedeļā kulturys īsacejumi nu juo.
TV raidejumi i filmys par Latvejis viesturi i Breiveibys ceiņom
Es īsaceitu, pyrmom kuortom, nūsavērt lobus TV raidejumus i filmys par Latvejis viesturi i Breiveibys ceiņom. Škārsteiklā ir breivi daīmamys taidys filmys kai “Mans zelts” ITE, kas veļteita Latvejis Armejis symtgadei, i cytys. Viņ tai – nu tūs tuolūs laiku līceibu – mes varim izprast, cik duorga cena ir moksuota par vaļsts naatkareibu, cik daudzi Latvejis dāli i meitys ticēja naatkareibys idejai i atdeve par jū duorguokū – sovu dzeiveibu. Itī stuosti cīš īdvasmoj, ari jaunīšus, partū ka Breiveibys ceiņuos pīsadaleja jūs vīnaudži.
Sorkonboltsorkonuos leņteitis pi driebu
Cīš byutiski itymā laikā ari sovā uorejā izskotā nest līceibu par Latveju. I mums ir breineiga tradiceja – sorkonboltsorkonuos leņteitis pi driebu! Ir ari cytys īspiejis. Pīmāram, myusu saime, meitom augūt, īsasaisteja vītejā aktivitatē: piļsātā tyka īreikuota eipaša vīta (kai laimis kūks), kur saimis varēja atīt i īsīt sovys sorkonboltsorkonuos leņteitis. Mozuo meiteņa sovu sorkonboltsorkonū leņteiti sēja iz kūka zamuokajim zorim, kur varēja dasnēgt, leluokuo – augšuok, i mes, vacuoki, – vēļ augšuok.
Tai mes vēlējuom laimi Latvejai. Tei ir skaista tradiceja, kū var īvīst vītejuos pošvaļdeibys voi bīdreibys sovā piļsātā, cīmā. Tān, kod navar reikuot publiskus pasuokumus i līgta puļciešonuos, ir cīš vierteigys itaidys individuali daīmamys vītys, kur izpaust sovu mīlesteibu pret vaļsti.
Apmeklēsim Latvejis Breiveibys ceiņuos krytušūs pīminis vītys!
Sevkurs patriotiski nūskaņuots cylvāks itamuos dīnuos var apmeklēt pīminis vītys, kas kotrā nūvodā ir izveiduotys, gūdynūt Latvejis Breiveibys ceiņuos krytušūs i Luočplieša kara ordiņa kavalerus. Varim nūlikt dagūšys svecis i zīdus, nūskaiteit lyugšonu i nūdzīduot vaļsts himnu “Dievs, svētī Latviju!” Breiveibys ceiņuos krytušūs atdusys vītuos i pi pīminis tālim, kū Aizsardzeibys ministreja pādejūs godūs ir pastatejuse daudzvīt Latvejā.
