Rokstu sagataveja: portals lakuga.lv

Atzeimejūt īvārojamuos latgalīšu politiskuos, kulturys i sabīdryskuos darbineicys i pedagogis Valerijis Seilis (1891–1970) 130. jubileju, Rēzeknis vaļstspiļsātys dūme pījēme lāmumu atjaunuot nūvodpietnīceibys dorbu konkursu “Valerijas Seiles balva” par Rēzekni i Rēzeknis nūvodu, informej Komunikacejis i uorejuos sadarbeibys nūdalis vadeituoja Nataļja Jupatova.

Kab veicynuotu muzeju, biblioteku, izgleiteibys īstuožu, vītejūs pietnīku interesi i aktivitati Latgolys kulturviesturiskuo montuojuma apzynuošonā i populariziešonā, tyka izstruoduots i apstyprynuots Konkursa nūlykums, komisejis sastuovs, kai ari izsludynuots pats konkurss. Rezultatā 9. novembrī palyka zynoms pyrmais atjaunuotuo Valerejis Seilis bolvys konkursa uzvarātuojs. Naudys bolvu 1000 eiro apmārā (piec vysu nūdūkļu nūmoksys), kai pīzeist konkursa komiseja, peļneiti sajims Rēzeknis nūvoda pošvaļdeibys īstuodis “Maltys apvīneibys puorvaļde” strukturvīneiba “Ozolaines pagasta pārvalde” par gruomotu “Ozolzīles zīmē”.

Gruomota “Ozolzīles zīmē” (sastateituoji – Sandra Ūdre i Edgars Blinovs) ir ryupeiga diveju godu informacejis par Ūzulainis pogostu, suocūt nu 13. godu symta da pat myusu dīnom, izpietis, vuokšonys i sistematiziešonys dorba rezultats. “Vysaidā ziņā unikals dorbs, kompleksys pīejis pīmārs, atspīgelejūt lokalū viesturi, kas pamatuots ar zynuotnisku pīeju nūvodpietnīceibai: ir rubrikators, nūruodeita nūvodpietnīciskūs materialu vuokšonys vīta i laiks, kai ari jūs olūti,” itai izdavumu nūviertēja vīna nu konkursa komisejis lūcekļu, Rēzeknis Tehnologeju akademejis docātuoja, gruomotu autore i sastuodeituoja Valda Čakša.

Kai pastuosteja pošvaļdeibys agenturys “Rēzeknes Kultūras un tūrisma centrs” direktore Kristīne Kokoreviča, piļneigi vysi žurejis lūcekli atzeimuoja konkursa nūzeimi, juo napīcīšameibu i dzeivuotspieju, paude atbolstu konkursa reikuošonai ari iz prīšku (reizi div godūs), a tymā pošā laikā izsaceja nūžālu par mozū interesi par konkursu itūgod, kod žurejai izviertiešonai tyka padūti viņ div dorbi. “Vysdreizuok mums daīs mierķtīceiguok popularizēt konkursu. Partū ka daleiba konkursā ir vareiba na viņ sajimt naudys bolvu, bet ari īpazeistynuot ar sova nūvodpietnīceibys dorba rezultatim daudz plašuoku cylvāku lūku,” atzeimuoja Kristīne Kokoreviča.