Pīsadoli ar Latgolys ainovu fotografejom akcejā “Mana unikālā Latvijas ainava”

Pīsadoli ar Latgolys ainovu fotografejom akcejā “Mana unikālā Latvijas ainava”

Rokstu sagataveja: portals lakuga.lv

Ituogods 20. oktobrī, 5. Storptautyskajā ainovu dīnā, tyka pastreipuota ainovu politikys lūma. Latvejā ainovu politikys i puorvaļdeibys vaicuojumi teik pieteiti, meklejūt sekmeiguokus rysynuojumus, Vaļsts pietejumu programys projektā “LandLat4Pol” ITE. Itamā projektā pietnīki organizej fotografeju akceju “Mana unikālā Latvijas ainava”, kab styprynuotu ainovys vierteibys apsazynuošonu sabīdreibā i dūtu  vareibu vysim interesentim pīsadaleit Latvejis digitaluo ainovu atlanta veiduošonā.

Projekta vadeituojs Pēteris Lakovskis komentej: ““Ainova” nūzeimej teritoreju tai, kai tū uztvar cylvāki i kas ir izaveiduojuse dobys voi cylvāku darbeibys i mejīdarbeibys rezultatā. Tei nav viņ “klusuo doba” bez cylvāku voi kaida idealizāta estetiska nūskaņa dobā. Ainova ītvar viesturiskūs nūtikšonu stuostus, regionaluos atškireibys, vītys identitatei nūzeimeigus elementus, veidoj daļu nu vīnuotuo dobys i kulturys montuojuma. Ainova īkļaun vītejū kūpīnu i plašuokys sabīdreibys vēļmis attīceibā iz jūs apleicīnis ainovys raksturīzeimem – kū gribim saglobuot, kū puormeit, kaidu redzēt apleicīni i kai veiduot jū deļ cytu paaudžu.

Īsaisteit sabīdreibu ir cīš svareigi, kab veicynuotu ainovys vierteibys apsazynuošonu i vareibu ītekmēt ainovu kvalitatis mierķus. Vide mums apleik mainuos – i piļsātā, i laukūs, i dobā, kū veicynoj dabiskī procesi i cylvāku darbeiba.

Partū, dolūtīs ar šaļteņu tvārumim, aicynojam dūmuot plašuok – na viņ vizuali estetiskuos kategorejuos i foto žanrā “dobys ainova”, tok ari: kai mes uztvaram apleicīni, kaidi ainovys elementi izceļ kaidu Latvejis vītu voi regionu, kai cylvāki puormej ainovu, īsasaista vītradē, kai styprynojās saikne storp cylvāku i vītu, veidojūt vidi, kaidā mes lobupruot grybātu byut. Dūmojit ari par tū, kas ir jums pījamamais ainovu izmaiņu slīksnis, cik tuoli nūsaceitys darbeibys apleicīnis puormeišonā ļaun jums vys justīs pīdereigam vītai, justīs jamā labi. Voi ir vēļ taidi ainovys elementi, kas izteikti soveigi jiusu vītai i regionam, paleidz pastreipuot identitati i atškireibys.”

Fotografeju akceja “Mana unikālā Latvijas ainava” nūtiks četruos kuortuos: pyrmuo nu jūs  “Mana unikālā rudens ainava” ituogods 20. oktobrī–30. novembrī, ūtruo akcejis kuorta – zīmā, 2022. gods janvarī i februrī, trešuo – pavasarī, aprelī–majā, nūslādzūšuo, catūrtuo, – vosorā, julī–augustā.

Pīsadolūt aktivitatē daleibnīks apstyprynoj, ka padūtuo fotografeja vāluok var tikt izmontuota Latvejis ainovu digitalajā atlantā. Augšynluodejūt fotografejis juonūruoda ainovys vītu (aptuvenys koordinatis, vītys nūsaukums), treis pīcus atslāga vuordus par itū ainovu, fotografeju autoru (nūruodūt, ci pīkreitat, ka tys pasaruoda publiski), tū var dareit ITE.

Vysu da ituo padūtūs ainovu fotografeju kolekceja i jūs atsarasšona vītys kartē daīmamys ITE. Kai redzim kartē, pagaidom ainovu fotografeju nu Latgolys ir vysmozuok.

Karteņa: ekranuzjāmums nu akcejis sātyslopys
Print Friendly, PDF & Email

Kalenders

Apr
19
Pīk
19:00 Grupys “Galaktika” albuma prezen... @ Ludzys tautys noms
Grupys “Galaktika” albuma prezen... @ Ludzys tautys noms
Apr 19 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]