Izdūts da ituo leluokais apkūpuojums par Latgolys fotografu darbeibu

Izdūts da ituo leluokais apkūpuojums par Latgolys fotografu darbeibu

Rokstu sagataveja: portals lakuga.lv

Vaļsts svātkūs, 18. novembrī, Preiļūs byus Igora Pliča i Pētera Korsaka Latgolys fotografu viesturis izziņu gruomotys “Latgales fotogrāfi laika ritumā XIX–XXI gadsimtā” attaiseišonys svātki. Gruomota byus da ituo leluokais i ar informaceju boguotuokais izdavums par Latgolā suocūt nu 19. godu symta vyda struoduojušajim fotografim.

Vīns nu gruomotys autoru, fotografs Igors Pličs stuosta, ka gruomotā “Latgales fotogrāfi laika ritumā XIX–XXI gs.” ir informaceja par Latgolā struoduojušajim fotografim suocūt nu pošu pyrmsuokumu – nu 19. godu symta vyda, nu 1858. gods da myusu dīnu. Pasasokūt Boltkrīvejis Nacionalajam arhivam ir informaceja par fotografim Latgolys teritorejā nu Vitebskys gubernis laika i niu ari zynoms, kuri fotografi poši pyrmī struoduojuši kai Daugovpilī, tai Rēzeknē, itaidi dati Latvejā vēļ nav bejuši publicāti. “Gruomotā ir informaceja par vaira nakai 300 fotografu, bet tī ari vēļ nav vysi fotografi, kurī struoduojuši voi niu struodoj Latgolā, daudzi, ari aktivī fotografi, dīvamžāļ palykuši “aiz borta”. Gruomotā īkļautī fotografi ir taidi, par kurim informaceju īdeve pošvaļdeibys, bīdreibys voi kaidi aktivi, atsauceigi ļauds. Pyrmū reizi vīnā sarokstā ir apvīnuoti Latgolys fotografi ar, cik jau beja vareiba dabuot, paplašynuotu informaceju. Par kotru fotografu gruomotā ir atvārums, ir saroksti, aproksti. Gruomotā ir puori par 2000 fotografeju, zeimūgu,” tai gruomotys saturu īskicej Igors Pličs.

Ideja par Latgolys fotografu darbeibys viesturis apzynuošonu i apkūpuošonu Igoram Pličam sovulaik rodusēs piec kaidys Vīseitē nūtykušuos konferencis “Buclera lasījumi”, kas nūsaukta Latvejis fotografejis pamatlicieja, Latvejis fotografu bīdreibys dybynuotuoja Mārtiņa Buclera (1866–1944) vuordā. Igors Pličs stuosta: “Tymā pasuokumā fotografs Arno Marnics tai izasaceja, ka Latgolys fotografu viesture asūt bolts plankums. Mani tys aizskuore i suoču vuokt informaceju, pieteit. Nu tuo laika niu paguojuši seši godi. Gruomotys satura taiseišonā cīši daudzi atsasauce uorzemnīku – Latgolā sovulaik struodojūšūs ebreju tauteibys fotografu piecteči. Grybu apgolvuot, ka ap 80 % Latgolys fotografu sovulaik bejuši ebreji. Itū dorbu uzskotu par kai taidu aizsuokumu – varbyut atsarass jaunys paaudzis, pietnīki, kuri varēs turpynuot itū pieteišonys lītu. Ruodīs, ka munā dzeivē itys ir leluokais dorbs. Par fotografu darbeibu Vydzemē i Kūrzemē cikom itaida izdavuma nav.”

Pi gruomotys taiseišonys sūpluok obeju autoru tolkā guojuši kai Vladimirs Nikonovs, Nikolajs Škuts, tai Maija Paegle, Solvita Kļavinska, Daina Salmiņa. Gruomotys izdūšonu atbaļstejuse Vaļsts kulturkapitala fonda Latgolys kulturys programa.

Gruomotys “Latgales fotogrāfi laika ritumā XIX–XXI gadsimtā” attaiseišonys svātki paradzāti 18. novembrī vīnā stuņdē piec pušdīņu Preiļu kulturys nomā.

Print Friendly, PDF & Email

Nūtikšonu kalendars

May
20
Pīk
19:00 Artura Skuteļa lelkoncerts “Jā” @ koncertzale "Palladium"
Artura Skuteļa lelkoncerts “Jā” @ koncertzale "Palladium"
May 20 @ 19:00 – 22:00
20. majā Reigā, koncertzalē “Palladium” nūtiks latvīšu hip-hopa muzika Artura Skuteļa lelkoncerts i jaunuo albuma “Jā” prezentaceja. Kai lelkoncerta eipašuo gaška ar sovu soloprogramu iz skotuvis kuops ari latgalīšu repere Ūga, kuruos 2020. godā izdūtais[...]