Leivuonā byus apsaverama stykla pyutieju dorbu izstuode “Līvāni = stikls”

Leivuonā byus apsaverama stykla pyutieju dorbu izstuode “Līvāni = stikls”

Rokstu sagataveja: portals lakuga.lv

Nu ituogods 1. decembra da 2022. gods 29. janvara Leivuona nūvoda Centralajā bibliotekā apmaklātuoji varēs apsavērt unikalus Leivuona Stykla i amatnīceibys centra (LSAC) stykla pyutieju Aleksandra Logvina i Valērija Veisa vysaidu formu izstuožu dorbus, informej LSAC mārketinga specialiste Maija Dziesma.

Piec Leivuona stykla fabrikys sliegšonys 2008. godā, tūreizejā Latgolys muokslys i amatnīceibys centrā 2016. godā tyka izveiduota stykla pyušonys darbneica, kuramā dorbu suoce pīredziejuši stykla pyutieji A. Logvins i V. Veiss. Meistaru prasmeiguos rūkuos tūp kruosaini i myrdzūši stykla darynuojumi i suvenirim, i praktiskai izmontuošonai. Itūšaļt LSAC interesenti var apsavērt i īsaguoduot A. Logvina i V. Veisa izgataveitūs vysaidu izmāru originalus dorbus, suocūt nu mozūs formu suveniru – putynu i dzeivnīku figureņu, zīdu, kruojkaseišu, videja izmāra trauku, da pat vysaidom lela izmāra vāžu. Sevkurs darynuojums ir unikals, partū ka teik radeits bez īprīšk sagataveitu formu. Meistari sasadorboj ari ar muokslinīkim, stykla darynuojumūs realizejūt vys jaunys idejis.

Stykla pyutieji Aleksandrs Logvins i Valērijs Veiss. Karteņa: publicitatis materiali

Izstuodis laikā tiks demonstrāta ari jaunuo eisfilma “Stikla pūšanas tradīcija Līvānos”, kurei pīduovoj īsavērt Leivuona stykla tapšonys procesā. Eisfilmā Leivuona stykla fabrikys bejušī stykla pyutieji doluos atmiņuos par sovom dorba gaitom i fabrikys bejušajim zīdu laikim. Stykla pyušonys tradiceja Leivuonā ir īkļauta Nacionalajā namaterialuo kulturys montuojuma sarokstā. Filma izveiduota pasateicūt, VKKF mierķprogramys “KultūrElpa” i Kulturys ministrejis atbolstam.

Eisfilma “Stikla pūšanas tradīcija Līvānos” digitaluos īreicēs daīmama sevkuram interesentam.

Print Friendly, PDF & Email

Kalenders

Apr
21
Svā
all-day Annys Laicānis izstuode “Dīķis u... @ Jiurmolys muzejs
Annys Laicānis izstuode “Dīķis u... @ Jiurmolys muzejs
Apr 21 all-day
Anna Laicāne (1984) par sovu dorbu kolekceju izstuodē “Dīķis un citi stāsti” soka: “Byušona dobā – mytruos vītuos, pi muorku i azaru raisa atminis par bierneibā skaiteitū Keneta Greiema gruomotu “Vējš vītolos”. Stuosts par pīdzeivuojumim[...]
15:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 21 @ 15:00 – 17:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]