Rokstu sagataveja: portals lakuga.lv

Ituogods 26. novembrī organizātajā dūmneicā golvonuo maneiba tyka pīvārsta pošu jaunīšu vīdūkļam – tīši jī izlems, kur veiduot sovu nuokūtni. Saprūtams, vysi gribim, lai jī sovys dzeivis veidoj tīši dzymtajā pusē, lai ite styprynoj sovys personeibys, atteista sovu karjeru, deļtam svareigi nūskaidruot jūs redziejumu i idejis par regiona prīškdīnom, Latgalīšu kulturys bīdreibys Latgolys Kongresa pasuokumu organizatoru vuordā informej Guntis Rasims.

Aktivitatēs īsasaisteja i sovu redzīni izsaceja jaunīši nu Rēzeknis, Bolvu, Preiļu, Ludzys, Leivuona i cytu regiona teritoreju. Ar sovu pīredzi dalejuos eksperti, sevi jau pīruodejuši aktivisti – Lauris Zalāns, Evika Muizniece, Aivars Mežatučs, Leila Rasima i Jurs Vucāns. Dūmneicu vadeja idejis vierzeituojs Guntis Rasims.

Sandis Mesters, vīns nu jaunīšu, kurs īsasaisteja aktivitatēs i leidzorganiziešonā, soka: “Dūmneicā beja īspieja uzklauseit dažaidu ekspertu vīdūkļus un jūs pīredzi taiduos jūmuos kai izklaide, izgleiteiba un dorbs. Vīns nu ūtra izzynuojom ari daudz kuo jauna par īspiejom Latgolā, kū var izbaudeit jau tagad. Kotrys raudzejom pasapņuot par tū, kaida varātu byut Latgola 2042. godā. Varu drūši saceit, ka jaunīši Latgolā ir gotovi nuokūtnei, partū ka idejis ir! Maņ personeigi spūdri atmiņā ir palics tys, ka apsprīžūt pīmynātuos treis jūmys, kotru reizi tyka pīmynāts zaļais kurss. Taitod var secynuot, ka jaunīši Latgolā dūmoj par dobu, par globalom dobys izmaiņom. Aptaujā par svareigom investicejom iz prīšku, leluokuo daļa nūruodeja, ka ir vairuok juoatbolsta jaunī uzjāmumi. Un tam es ari pīkrisšu, partū ka ekonomiku veidojam mes poši ar sovu dorbu. Ka cylvākam ir ideja, ka cylvāks grib veiduot sovu uzjāmumu, tod jam ir juopaleidz. Tys styprynuos Latgolys i Latvejis ekonomiku.

Latgolys jaunīši ir gotovi sovus sapynus realizēt, partū ka mes asam tī, kas iz prīškdīnom veiduos Latgolu par ekonomiski spieceigi atteisteitu regionu, saglobojūt sovu kulturviesturi, volūdu, identitati i latgalīšu tradicejis. “Lai veiduotu nuokūtni, nikas nav tik napīcīšams, kai sapyns par tū…” ir pasacejs Viktors Igo.”

Dūmneicu reikuoja Latgalīšu kulturys bīdreiba sadarbeibā ar Latvejis Nacionalū kulturys centru i 4. pasauļa latgalīšu saīta reiceibys komiteju – tys beja jau ūtrais seminars vairuoku pasuokumu cyklā, gatavejūtīs Latgolys Kongresam 2022. gods apreļa beiguos.

Tīšsaistis dūmneicys īrokstu var nūsavērt ite: