Rokstu sagataveja: portals lakuga.lv

Sastdiņ, 18. decembrī, Latgolys viestnīceibys GORS lelajā zālē izskanēs jau četrys reizis puorcaltais koncerts “Celīs, bruoļ!”. Tymā dzīsmis nu Latvejis Symtgadis Latgolys Kongresa muzykys izlasis albuma ar taidu pošu nūsaukumu “Celīs, bruoļ!”.

Guntis Rasims, vīns nu koncerta organizatoru, prīcojās: “Koncerts “Celīs, bruoļ!” beidzūt nūtiks! Itys ir pyrmais koncerts organizatoru i muokslinīku pīredzē, kuru daguoja puorceļt vasalys četrys reizis. Kotrys nūlyktais datums da šam regulari “veiksmeigi” īkryta styngruoku īrūbežuojumu periodūs. Prūtams, i poši muokslinīki, i pasuokuma apmaklātuoji da pādejai nedelei naticēja, ka beidzūt atīs gondreiž 20 mienešus gaideitais nūtykums. Bet niu, redzīs, ka zvaigznis beidzūt ir sasastuojušys pareizuos vītuos. I ituos myusu zvaigznis 18. decembrī kuops iz “Gora” skotivis.”

Koncerta programā varēs dzierdēt dzīsmis nu Latvejis Symtgadis Latgolys Kongresa muzykys izlasis albuma “Celīs, bruoļ!” i cytys pazeistamys latgalīšu melodejis, pīmāram, “Tuoli dzeivoj”, “Rūžeņa”, “Jezups” i cytys.

Dzīsmis izpylda – Jānis Aišpurs (“The Sound Poets”), Arņs Slobožanins (“Dabasu Durovys”), Guntis Rasims (“Bez PVN”), Ēriks Zeps (“Rikši”), Jurs Ostrovskis (“Dvinskas muzikanti”), Jana Dudare (“Piparmētra”), Aņss Ataols Bierzeņš (“Maskačkys Muzykanti”), Ingars Gusāns (“Sovvaļnīks”), Ūga (“Ausmeņa Records”), “Graidu” veiri Juoņa Mežinska vadeibā i cyti pazeistami latgalīšu muzykanti.

Dažaidūs muzykys stilu latgalīšu muokslinīku apvīneibai ar leidzeigu koncertprogramu ir bejuse jau īspieja uzastuot vaļsts svātku svineibuos Viļakā i Sutru kulturys pilī.

“Pa storpam gadejuos i kaids kuriozs. Kod kaidys vītejuos pošvaļdeibys kulturys dzeivis malieji aicynuojuši ar mynātū koncertprogramu uzastuot vaļsts svātku aktivitatēs. Golā gon atsacejuši, nūruodūt, ka programmā nav patriotisku dzīšmu. Organizatorim tys bejs lels puorsteigums, jamūt vārā, ka “Celīs, bruoļ!” programu pamatā veidoj leluokuo daļa patriotiskuokūs i tautyskuokūs latgalīšu melodeju. Goduos vysaiž,” pīzeist Guntis. “Sasateikam 18. decembrī “Gorā”! Cerim, ka asat sasagaidejuši itū kūpā byušonu taipoš kai i mes.”

Latvejis Symtgadis Latgolys Kongresa muzykys dzīšmu izlasi “Celīs, bruoļ!” var nūsaklauseit ite.