Tūp gruomota “Latgalīšu volūda suociejim”

Tūp gruomota “Latgalīšu volūda suociejim”

Roksta autors: portals lakuga.lv

Jau ūtru godu ar Latgolys kulturys programys finansialu atbolstu kulturvīta “Volūdu sāta” aba “Valodu māja” turpynoj dorbu pi unikalys vuiceibu gruomotys. Tamā sevkurs grybātuojs kūpā ar varūnim Agnešku, Ādamu, Gundegu i Viktoru varēs vuiceitīs latgalīšu volūdu.

Pūlīte Agneška īsapazeist ar latvīšu piecteci ASV Ādamu īsapazeišonys aplikacejā “Cymuss”, reidzineica Gundega naplānuotai teik Daugovpilī pi pīterpilīša Viktora, deļtam ka jai ir vajadzeigs pīredziejs mebeļu restaurators, i Viktors taids ir. Jis ir ari prieciejīs ar latgalīti Ināru, deļtam grib apguit latgalīšu volūdu taipoš kai Ādams, kurs beiguos nu Teksasys teik Rēzeknē i paleidz Inārai atrast seņ maklātu radineicu.

Gruomotys pamatā byus lykts uzsvors iz volūdys komunikativū funkceju, juos mierkauditoreja byus latvīšu, krīvu i angļu volūdā runojūši interesenti. “Gribim izceļt – latgalīšu volūda ir dzeiva volūda, kū daudzi cylvāki izmontoj kasdīnys saziņā saimē, draugu storpā i cytur. Gribim paruodeit, ka tei nav seneja, izmierstūša volūda, bet ka tū var ārtai izmontuot vysaiduos myusdīneiguos dzeivis situacejuos,” par gruomotu stuosta “Volūdu sātys” projektu vadeituoja Elīna Kokareviča.

Projektā īsaisteiti daudzi latgalīšu volūdys specialisti, volūdnīki i volūdu pazinieji, kas puorzyna komunikativuos niansis i var paleidzēt vuiceibu materialam palikt lobuokam. Pi projekta struoduoja Snorre Karkonens-Svensons – volūdnīks i komunikativuos pīejis puorzynuotuojs, Muora Mortuzāne-Muravska – latgalīšu volūdys specialiste, materiala veiduotuoja i tulkuotuoja, Maruta Latkovska – latgalīšu volūdys redaktore i konsultante raksteibys i izrunys vaicuojumūs, Alise Birnbauma – volūdu pasnīdzieja, tulkuotuoja i materiala izstruoduotuoja atbylstūši Eiropys Kūpeigūs pamatnūstuodņu volūdu apgivei standartim, Solvita Berra – volūdneica i piļsāttekstu eksperte, Oskars Orlovs – tekstu autors i latgalīšu humora eksperts, Egle Žilinskaite – padūmdevieja materialu strukturys izstruodē.

Vysi gruomotu varūni kūpā. Karteņa: Volūdu sāta

“Suocūt projektu pārnejā godā, varbyut pat nadadūmuojom, cik apjūmeigs i laikītiļpeigs tys byus. Cytu reizi beja gribiešona nūlaist rūkys, bet varim byut pateiceigi tam, ka myus atbolsta kai daudzi gudri cylvāki, kas ir pīkrytuši pīsadaleit projektā, tai ari Latgolys kulturys fonds, deļtam ka itei ir vareiba na tikai nazkū radeit, bet ari pošim vysu laiku vuiceitīs i apguit kū jaunu, puorvarēt izaicynuojumus i augt,” pīzeist Elīna.

“Gruomotys izveidis komanda samārā eisā laikā veice apjūmeigu i novatorisku dorbu, deļtam ka ir izveiduota gon vuiceibu vīlys apgivis struktura, saturu grupejūt atbiļsteigi temom i veidojūt praktiskus aizdavumus, gon literarais viestejums, kas caurauž gruomotu i ļaun identificēt sevi ar juos varūnim, dzeivim cylvākim ar sovim raksturim, vajadzeibom i problemom. Ite nav idealūs cylvāku i dialogu, kai tys naratai ir nūvāruojams vuiceibu gruomotuos – vīnam nu varūņu nav rūkys, cytam saimis,” pīzeist Dr. Philol. Ilze Sperga, kas recenzēja materialu.

I. Sperga arī nūruoda iz tū, ka, varams, ryudeitu latgalīti katuoli atbaideis gruomotā īkļautuos niu aktualuos socialipolitiskuos temys, pīmāram, veganisms, LGBT+ tīseibys, feminisms, bet gruomotys idejis autors, volūdnīks i “Volūdu sātys” rodūšais vadeituojs Snorre Karkonens-Svensons akcentej, ka gruomota, pyrmom kuortom, ir gataveita, kab veicynuotu latgalīšu volūdys lītuojumu i uzturātu volūdys statusu eipaši jaunīšu vydā, lai par tū radeitu interesi ari uorpus Latvejis.

“Nu pyrmaulmaņa laiku tei nav bejuse školys i administracejis volūda, lai tei byutu dzeiva vēļ iz prīšku, nazkas ir juodora niule. “Volūdu sātys” stypruokuo kompetencis jūma ir volūdu apgive i vuiceišona, deļtam taišni ite mums ir bejuse vareiba dūt sovu artavu. Ir svareigi, lai aizsprīdumi i konotacejis nabyutu škieršli potencialim lītuotuojim identificēt sevi ar volūdu i jū lītuot. Deļtam gruomotā atkluojam volūdu myusdīnu kontekstā, dūdūt vaira vītys urbanajam, na laukim, golu golā daudzi latgalīši dzeivoj Reigā, Londonā i cytuos piļsātos, vairuok īkļaujūšom vierteibom par tradicionalū katuoļticeibu, kai ari aktualizejam socialūs vaicuojumus, kas svareigi myusu laiku jaunatnei,” stuosta Snorre.

2020. godā, projekta suokumā, izstruoduoja pamata mamterialu – gruomotys losomtekstu sižetu, tekstus, dorba aizdavumus i c. Itūgod uzmaneibys centrā ir gribiešona asūšū materialu uzlobuot i papyldynuot, pīmāram, izstruodojūt latgalīšu-latvīšu-angļu-krīvu vuordineicu, izrunys i fonetikys materialu itt, kai ari izstruoduot klauseišonuos materialu. Gruomotu papyldynoj boguoteigys ilustracejis, kurūs autore ir muokslineica Milica Protiča-Kojoviča, taipoš nūteik unikali latgalīšu volūdys kursi, kurūs voda latgalīšu volūdys zynuotuoja, bīdreibys “LgSC” bīdre Vineta Vilcāne, vaira par kursim var skaiteit ITE.

Par klauseišonuos materiala izveidi atbiļd akters i īrokstu studejis “Reiga” vadeituojs Kristaps Rasims. Lai īskaņuotu vysu sagataveitū materialu, procesā tyka īsaisteiti 15 runuotuoji. Bolsus īrunuoja: Kristaps Rasims, Inga Misāne-Grasberga, Aina Jurdža, Inta Ostrovska, Baiba Stepanova, Leila Rasima, Zofija Ritiņa, Ainārs Linužs, Guntis Rasims, Juris Vucāns, Normans Bārbals, Valdis Vucāns, Andžejs Rasims, Terēze Rasima i Ernests Rasims.

Print Friendly, PDF & Email

Nūtikšonu kalendars

Sep
26
Pyr
17:00 LTG i ES. Dzeivuos sarunys. Eiro... @ Latgolys Centraluo biblioteka
LTG i ES. Dzeivuos sarunys. Eiro... @ Latgolys Centraluo biblioteka
Sep 26 @ 17:00 – 20:00
Pyrmūdiņ, 26. septembrī, “Europe Direct Dienvidlatgale” centrs, bīdreiba “LgSC” i Eiropys Savīneibys informacejis punkts Daugovpilī aicynoj iz Eiropys Volūdu dīnai veļteitu nūtykumu “LTG i ES. Dzeivuos sarunys” Daugovpilī, Latgolys Centralajā bibliotekā. Pasuocīņa laikā dzeivuos bibliotekys[...]
Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Oct
1
Sai
vysu dīnu Izstuode “Jura Gaigala akvareļi” @ Latgolys Kulturviesturis muzejs
Izstuode “Jura Gaigala akvareļi” @ Latgolys Kulturviesturis muzejs
Oct 1 vysu dīnu
Nu 21. septembra da 1. oktobra Latgolys Kulturviesturis muzejā apsaverama izstuode “Jura Gaigala akvareļi”. Ceļojūšuo izstuode veļteita gruomotys “Jura Gaigala varavīksne” izīšonys svātkim. Tiks izstuodeitys muokslinīka akvareļgleznys nu meitys Dacis Gaigalys kolekcejis.