Pīsasoki 2022. goda Latgolys kongresam!

Pīsasoki 2022. goda Latgolys kongresam!

Latgolys kongresa dorba grupa aicynoj pīsateikt Latgolys kongresam, kas nūtiks 2022. goda 27.–29. aprelī Rēzeknē, Latgolys viestnīceibā “Gors” i Rēzeknis Tehnologeju akademejā. Kongresa tema – “Latgaliskuma kods Eiropā: nu volūdys da ekonomikai”. Referatus pīsaceit daleibai kongresā var da 2022. goda 31. janvara, bet delegatim i klauseituojim juopīsasoka da 2022. goda 10. februara, elektroniski aizpyldūt dasaceišonys anketu sātyslopā ITE, Kongresa dorba grupys vuordā informej Maija Upeniece.

Kongresā ar referatim aicynojam pīsadaleit pietnīkus, politikus i vysaidu nūzaru praktikus, kai ari vaļsts instituceju i īstuožu, pošvaļdeibu i navalstiskū organizaceju puorstuovus. Jamūt vārā storpdisciplinarūs pietejumu pīaugumu i svareigumu ari Latgolys regiona problemu rysynuošonā, gaideisim pīsacejumus, kurī respektej myusu dīnu zynuotnis atteisteibys tendeņcis i padzilinoj myusu informieteibu i sapratni humanitarajuos (volūdys, kulturviesturis, folkloristikys, literaturzynuotnis), socialajuos (regionaluo ekonomika, demografeja, uzjiemiejdarbeiba, lykumdūšona, drūšeibys vaicuojumi i c.) i inžinerzynuotnēs (vidis, informacejis tehnologejis, byuvnīceibys i c.). Pīsokūt temys i izstruodojūt tezis kongresam, puordūmojit i nūvērtejit sova referata aktualitati konkretys nūzaris, taipat Latgolys i latgaliskuos ideņtitatis atteisteibys kontekstā Latvejis i Eiropys kulturys, izgleiteibys, tautsaimnīceibys telpā. Aicynojam aktivi īsasaisteit mierktīceigu prīšklykumu izstruodē regiona atteisteibys ceļšonai.

2022. goda Latgolys kongress nūtiks vairuokuos sekcejuos, kur pīsadaleis gon kongresa delegati i kongresa daleibnīki, gon aicynuotī gosti. Kongresa delegati puorstuvēs gon Latgolys īdzeivuotuojus proporcionali skaitam nu teritorejis, gon pošvaļdeibys, Bazneicu, navaļstiskuos organizacejis, kas aktivi dorbojās Latgolā, izgleiteibys īstuodis, uzjiemiejus, latgalīšus nu cytom viesturiskajom zemem, kai ari uorpus Latvejis dzeivojušūs latgalīšus. Delegatim i klauseituojim dasasaceišonys elektroniskuo anketa juoaizpylda da 2022. goda 10. februara.

Īcarāts, ka Latgolys atteisteibai aktuali zynuotniskī prīšklasejumi meisīs ar streideigu vaicuojumu publisku apsprīsšonu, kab kongresa gaitā varātu izstruoduot rezolucejis pamatpunktus i kongresu beigt ar konkretim prīšklykumim tautsaimnīceibys, drūšeibys, kulturys, izgleiteibys, volūdys i plašsazinis leidzekļu politikys atteisteibai.

Četru godu pīredze piec 2017. goda Latgolys symtgadis kongresa, a seviški Latvīšu viesturyskūs zemu lykuma pījimšona, aplīcynoj vajadzeibu regulari i mierktīceigi apkūpuot i vierzeit Latgolai i juos dzeivuotuojim nūzeimeigus vaicuojumus. Partū ir svareigi vysmoz reizi pīcūs godūs, nūdrūšynojūt atbiļsteigu puorstuovnīceibu kai nu īdzeivuotuoju, tai i nu pošvaļdeibu, NVO i cytu organizaceju, analizēt asūšū situaceju i izvierzeit praktyskus aizdavumus i vaicuojumus, kas svareigi Latgolys atteisteibai.

Aicynuojums pīsadaleit kongresā (ar referatu voi stenda referatu) ITE.

Saīta rezolucejis izpiļdis komitejis lāmums, kurā radzams delegatu sadalejums ITE.

Print Friendly, PDF & Email

Nūtikšonu kalendars

Jan
31
Pyr
22:00 Referatu pīsaceišona Latgolys ko... @ Tīšsaistē
Referatu pīsaceišona Latgolys ko... @ Tīšsaistē
Jan 31 @ 22:00
Referatu pīsaceišona Latgolys kongresam @ Tīšsaistē
2022. gods 31. janvars ir pādejuo dīna, kod 27.-29. aprelī nūteikūšajam Latgolys kongresam var pīsaceit sovus referatus. Kongresa tema – “Latgaliskuma kods Eiropā: nu volūdys da ekonomikai”. Aicynuojums pīsadaleit kongresā (ar referatu voi stenda referatu) ITE.[...]
Feb
5
Sai
18:30 Izruode “Pa Laimes lāča pēdām” @ Daugovpiļs teatris
Izruode “Pa Laimes lāča pēdām” @ Daugovpiļs teatris
Feb 5 @ 18:30
Izruode "Pa Laimes lāča pēdām" @ Daugovpiļs teatris
5. februarī 18.30 stuņdēs Daugovpiļs teatrī byus nūsaverama muzykala puorsoka pīaugušajim “Pa Laimes lāča pēdām” Oļega Šapošnikova režejā, kas pyrmizruodi ar stuovaplausim pīdzeivuoja 10. decembrī. Izruode veiduota piec Andreja Upīša stuosta “Sūnu ciema zēni” motivu[...]