Rēzeknē byus apsaverama daļa nu ituogods Pīguožņa bolvys izstuodis

Rēzeknē byus apsaverama daļa nu ituogods Pīguožņa bolvys izstuodis

Rokstu sagataveja: portals lakuga.lv

Nu 22. decembra da cytagods 5. februara Latgolys Kulturviesturis muzejā apsaverama daļa nu 2021. gods konkursa “Jāzepa Pīgožņa balva Latvijas ainavu glezniecībā” izstuodis, kas atceļuojuse iz Rēzekni nu Preiļu, viesteits Rēzeknis vaļstpiļsātys dūmis sātyslopā.

Izstuodis mierkis ir īpazeistynuot vys plašuoku sabīdreibu Latvejā ar konkursa daleibnīku i it eipaši nominantu veikumu. Kai tyka atzeimuots izstuodis atkluošonys pasuokumā Preiļu Viesturis i lītiškuos muokslys muzejā ituogods 25. septembrī, ainovu gleznīceiba pošlaik ir iz atdzimšonys viļņa, i tys ir ari ituos izstuodis nūpalns, popularizejūt dobys attāluojumu tik daudzveideigajā muokslys jūmā Latvejā.

Itūgod konkursam pavysam tyka padūti 103 muokslinīku 174 dorbi. Izstuodis atkluošonā 11. augustā Reigys Sv. Pītera bazneicā tyka paziņuoti 2021. gods golvonuos bolvys nominanti: Meldra Bula par dorbu “Jūlijs”, Jānis Ziņģītis par dorbu “Janvāra sākumā”, Osvalds Zvejsalnieks par dorbu “Rudens vēji”, Agnija Ģērmane par dorbu “Sapnis, kas atkārtojas 2”, Ērika Kumerova par dorbu “Pavasara jūtoņa”, Inga Jurova par dorbu “Svētdiena. Kailsals”. 2021. gods golvonū bolvu sajēme riezeknīts O. Zvejsalnieks.

“Jāzepa Pīgožņa balvas Latvijas ainavu glezniecībā” izstuode i bolvys padūšona nūteik jau nu 2015. gods. Tūreiz golvonū bolvu sajēme Latvejis Universitatis profesors, muokslinīks Roberts Muzis, 2016. godā – muokslineica Silva Linarte, 2017. godā – muokslinīks Aldis Kļaviņš, 2018. godā – muokslinīks Jānis Plivda, 2019. godā par konkursa laureatu –muokslinīks Nugzars Paksadze, 2020. godā – Agra Ritiņa.

Muokslys zynuotneica i ituo konkursa vairuokkuortejuo žurejis komisejis lūcekle Ingrīda Burāne par “Jāzepa Pīgožņa balvu Latvija ainavu glezniecībā” soka tai: “Preiļu nūvoda dūmis i Reigys dūmis kūpdorbs, atbolstūt muokslinīka Jezupa Pīgožņa (1934–2014) draugu Jāņa Anmaņa, Juoņa Streiča i Juoņa Strupuļa iniciativu sadarbeibā ar Latvejis Muokslys akademeju i Latvejis Zynuotņu akademeju, faktiski ir vīneiguo itaida veida oficialu instituceju leidzdaleiba muokslys procesu veicynuošonā, izviertiešonā i tuoļuok vierzeibā. Sovā ziņā itei ir pošlaik Latvejā demokratiskuokuo i atvārtuokuo muokslys dzeivis nūtikšona, kuramā pīsadola autori nu vysu nūvodu. Nav leidzeiga sovā apjūmā i autoru rūkrokstu vysaideibā ūtra taida muokslinīciskuos kūpainys redziejuma, kas vīnuotu piļneigi atškireigys izgleiteibys, tauteibys, muokslinīciskūs tīksmu i variešonys, paaudžu pīdereibys i cytu sovrupu pazeimu personeibys.”

Īejis moksa: školānim i studentim – 0,50 eiro, pīaugušajim – 2,00 eiro, ar Riezeknīša karti – bez moksys.

Print Friendly, PDF & Email

Nūtikšonu kalendars

Jan
26
Tre
vysu dīnu Nūvodpietnīceibys lasejumi prāve... @ Bolvu Nūvoda muzejs, tīšsaiste
Nūvodpietnīceibys lasejumi prāve... @ Bolvu Nūvoda muzejs, tīšsaiste
Jan 26 vysu dīnu
Nūvodpietnīceibys lasejumi prāvesta Alberta Budžis pīmiņai @ Bolvu Nūvoda muzejs, tīšsaiste
Gūdynojūt prāvesta Alberta Budžis (1930–1957–2017) atceri, Bolvu Centraluo biblioteka aicynoj pietnīkus pīsadaleit “Novadpētniecības lasījumos prāvesta Alberta Budžes piemiņai”. Tēmu lūks nav īrūbežuots, jis ītvar sevkuru pietnīku interesejūšu jūmu, kurys izpietis teritoreja ir Bolvu nūvods. Lasejumu[...]
Jan
28
Pīk
19:00 Gruomotys “Mīlas kastings” muzyk... @ Babeitis Kulturizgleiteibys centrs
Gruomotys “Mīlas kastings” muzyk... @ Babeitis Kulturizgleiteibys centrs
Jan 28 @ 19:00 – 21:00
Gruomotys "Mīlas kastings" muzykaluo prezentaceja @ Babeitis Kulturizgleiteibys centrs
28. janvarī 19.00 Babeitis Kulturizgleiteibys centra lelajā zalē, Piņkūs, nūtiks rakstneicys Ilzis Aizsilys gruomotys “Mīlas kastings” muzykaluo prezentaceja.   Par latgalisku nūskaņu pasaryupēs: rakstneica Ilze Aizsila i improvizators Viesturs Vizulis; muzykys grupa “Dabasu Durovys”; videjuos[...]