Ar gruomotu “Jākuba citati” rūsynoj vacuokus vaira sasarunuot ar bārnim

Ar gruomotu “Jākuba citati” rūsynoj vacuokus vaira sasarunuot ar bārnim

Rokstu sagataveja: portals lakuga.lv

Goda golā izdūšonu pīdzeivuojuse gruomota “Jākuba citati”, kas rūsynoj vacuokus vys vaira kasdīnā sasarunuot ar bārnim, skaidruot sajiutys, lītys i aicynoj bārnus dūmuot i atrast atbiļdis iz sev interesejūšim vaicuojumim. Gruomotys autori ir desmitgadeigais Jēkabs Birznieks i juo mama Īva Johansson. “Jākuba citati” interesentim ir daīmami divejuos versejuos – kai latvīšu literarajā, tai latgalīšu rokstu volūduos, portalam paviestieja gruomotys autore.

Īva Johansson, kurei kasdīnā ir izaugsmis platformys “MeYou.One”, kuruos sātysvīta ir Daugovpiļs, trenere, pasuokumu moderatore, darbneicu vadeituoja i jaunuos rodūšuos ustobys “Room13” saimineica, par sevi soka, ka ir vīnkuorša mama, kurei ostoņu godu garumā pīrakstejuse niu jau desmit godu vacuo dāla Jēkaba dūmys, izsacejumus i citatus. Niu tī apkūpuoti gruomotā “Jākuba citati” i papyldynuoti ar iz sarunom rūsynūšim vaicuojumim par attīceigū temu. Drūsme, sāta, mīlesteiba, saprasšona, dorbs, ryupis, uzvarys i cytys kūpā pi pīcdesmit temu paleidzēs vacuokim sasarunuot ar bārnim, izskaidruot procesus, lītys i vysim kūpā ari dabuot atbiļdis.

Aicynojūt īpazeit “Jākuba citatus”, Īva soka: “Kasdīnā bārni vacuokim aizdūd sev aktualus vaicuojumus. Komunikaceja ir svareiga, kab bārns atsateisteitu i dabuotu atbiļdis iz svareigū. Kab izaveiduotu par sabīdreibys lūcekli, jam ir vajadzeigi skaidruojumi par attīceibu lykumsakareibom, par pastuovūšom socialekonomiskajom sistemom i procesim. Taipat, pasasokūt tam, ka sūpluok aug bārni ar sovu dabiskū interesi, zynuot gribiešonu, vacuokim ir vareiba pošim otkon puordūmuot sovys vierteibys i saimē izceļt tuos svareiguokuos. Obeji ar Jēkabu vielejam, ka bitei gruomateņa ir kai īdviesme mīlesteibys, jaunu izzynuošonu i breinumu sarunom!”

Izdavums “Jākuba citati” sataiseits, sasadorbojūt ar bīdreibu “LgSC”. Bīdreibys vadeituoja Edeite Husare soka: “Ir īrosts, ka latgaliski da ituo bejuši izdūti literari voi kulturviesturiskim tematim veļteiti dorbi, deļtuo prīca, ka “Jākuba citati” padora plotuoku latgaliski daīmamūs izdavumu pīduovuojumu ar itaida veida temu i varēs prīcynuot jo eipaši tuos saimis, kuruos vacuoki ar bārnim ari sasarunoj latgaliski.”

Gruomotā Jēkaba sprīsšonu i vaicuojumus sarunom papyldynoj jaunuos, deveņgadeiguos muokslineicys Ariannys Evelinys Žeiris zeimiejumi. Daļa gruomotys ījāmumi tiks pazīduoti lobdareibys organizacejis “Palīdzēsim.lv” mierku sasnēgšonai dorbā ar saimem i bārnim.

Print Friendly, PDF & Email

Kalenders

Jul
16
Ūtr
17:00 Rezidejūšūs muokslinīku publisku... @ Rotko muzejs
Rezidejūšūs muokslinīku publisku... @ Rotko muzejs
Jul 16 @ 17:00 – 18:30
16. julī 17.00 stuņdēs Rotko muzejā sevkuram byus vareiba īpasazeit tyvuok ar ostonim storptautyskim muokslinīkim publiskajuos prezentacejuos, kurymuos jī īpazeistynuos ar sevi i sovu dailradi.   Nedelis garumā, nu 12. da 19. juļa Eiropys Savīneibys[...]
Jul
18
Cat
14:00 Bolvu nūvoda svātki @ Bolvi
Bolvu nūvoda svātki @ Bolvi
Jul 18 @ 14:00 – Jul 20 @ 23:45
Bolvu nūvoda svātki @ Bolvi
16:00 Storptautyskuos rezidencis nūslā... @ Rotko muzejs
Storptautyskuos rezidencis nūslā... @ Rotko muzejs
Jul 18 @ 16:00 – 17:30
18. julī 16.00 stuņdēs Rotko muzeja konferenču zālē nūtiks storptautyskuos rezidencis nūslāguma izstuodis atkluošona.   Nedelis garumā, nu 12. da 19. juļa Eiropys Savīneibys finansātuo projekta “Eiropas kultūra: Visi dažādi – visi vienlīdzīgi” laikā Rotko[...]