Dasoki Cimzis bolvai izcyluokūs kulturizgleiteibys školuotuojus nu Latgolys

Dasoki Cimzis bolvai izcyluokūs kulturizgleiteibys školuotuojus nu Latgolys

Rokstu sagataveja: portals lakuga.lv

Da ituogods 5. marta Latvejis Nacionalais kulturys centrs (LNKC) aicynoj dasaceit Cimzis bolvai izcyluokūs kulturizgleiteibys nūzaris pedagogus. Cimzis bolva ir eipašs apbolvuojums školys pedagogam – izcileibai par ilggadeju pedagogiskū darbeibu i byutisku īguļdejumu vuiceibu i audzynuošonys dorbā, jū padūt reizi myužā, informej  LNKC Sabīdryskūs attīceibu specialiste Linda Ertmane.

Pedagoga, tautysdzīšmu vuocieja, latvīšu kora muzykys pamatlicieja i profesionaluos muzykys izgleiteibys aizsuocieja Jāņa Cimzis (1814–1881) vuordā nūsauktū bolvu izcyluokajim muzykys, muokslys, dizaina i dejis pedagogim LNKC īdybynuoja 2014. godā. Bolvu sevkuru godu padūd div pedagogim. Cimzis bolvys laureats sajam Goda diplomu, naudys bolvu 1300 eiro apjūmā i graznu pīminis veļti – simbolisku ūzulkūka ruodomkūku ar miseņa apkolumu.

Pyrmais i pagaidom vīneigais Cimzis bolvys sajiemiejs nu Latgolys ir Staņislava Broka Daugovpiļs Muzykys vydsškolys klarnetis i saksofona spēlis školuotuojs Staņislavs Gribusts. Jis ir energisks i spylgts pedagogs. Juo darbeiba cīši saisteita ari ar orkestrim, kurymūs bejs i muzikis, i dirigents. Vairuok nakai 20 Staņislava Gribusta bejušūs audziekņu ir pedagogi muzykys školuos i vydsškoluos, kai ari dorbojās profesionalajūs orkestrūs. Školuotuoja nūzeimeigū īguļdejumu stuojis i skaniejuma veiduošonā akcentej Nacionalūs Bruņuotūs spāku Štāba orkestris, kuru par sovu dorba i dīnesta vītu ir izalasejuši pīci juo izškoluoti klarnetisti: Andrejs Teležņikovs, Guntars Gedroics, Česlavs Grods, Ivars Lavrinovičs i Ojārs Spila.

Bīdreibys “Latvijas Jauniešu pūtēju orķestris” kolegys augstu nūviertej Staņislava Gribusta veikumu jaunīšu vosorys nūmetnēs – spieju cīš dreiži reagēt iz jaunūs muziķu prasmem i spiejom, izalosūt pareizu repertuaru rezultata sasnīgšonai i tūpūšūs muziķu īinteresiešonai. Vīnlaikus školuotuojs mierķtīceigi vierzej jaunūs muziķus tuoluokai profesionalai izaugsmei. Runa ir na viņ par instrumenta spēlis apgivi, bet ari jaunuo muziķa personeibys veiduošonu. Tai par S. Gribustu, paziņojūt par jam pīškiertū Cimzis bolvu, pārņ beja saceits LNKC izplateitajā apbolvuojuma pavodtekstā.

Dasacejuma aketa i nūlykums atrūnami LNKC škārsteikla vītnē ITE.

Cimzis bolvys padūšonys pasuokums i laureatu izziņuošona plānuota 2022. gods majā reizē ar Kulturys ministrejis apbolvuojuma pīškieršonu par jaunīšu sasnāgumim storptautyskajūs konkursūs, izstuodēs i skatēs muokslu nūzarēs. Reagejūt iz maineigū epidemiologiskū situaceju vaļstī, pasuokuma nūtikšonys formats var tikt puormeits.

Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
15:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 13 @ 15:00 – 17:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]