Rokstu sagataveja: portals lakuga.lv

Izguojs žurnala “A12” apreļa/maja numers, kurā sarunys ar režisori i dramaturgi Kristu Burāni, dirigentu Jāni Grudulu, nūslāpumainuokū latgalīšu literati Mariju Dzeislu i cyti stuosti.

Žurnala redaktore Ināra Groce redaktoris slejā iz vysu pasauļa nūtikšonu fona īdrūsynoj: “Kab sasajustu drūsai, kod sābrūs ir agresivs pliesiejs, laimis sajiutai mierktīceigi juostyprynoj sova kūpīnā i prasšona byut. Kotram juodora tys, kū vysalobuok jādzam, tei ari ir vareiba seve i sūpluok asūšūs aizstuovēt.”

Apreļa/maja žurnalā “A12” skaitit:

• puormaiņu laika filozofeja par eiropeiskom vierteibom – aktualajā intervejā teatra i kinu režisore, dramaturge Krista Burāne;
• saruna ar dirigentu Jāni Grudulu, “Boņuks 2021” myuža īguļdejuma latgalīšu kulturā bolvys sajiemieju;
• kai sasajust drūsai i kū varim īsavuiceit nu himbu – interveja ar Jāni Stari, kura Afrikā taiseituos biļdis niu apsaveramys Lūznovys muižā;
• deļkuo akvareļgleznīceiba – muokslineicys Elgys Paurys skatejums i pīredze;
• kai 20 godu laikā pasamejuse Rēzekne – amerikanītis Kortnijis Kvīnys atkluosmis;
• Valentina Lukaševiča Rundānu stuosts;
• kas ir nūslāpumainuo Marija Dzeisla – tū žurnala puslopuos rauga atkluot portala lakuga.lv redaktore Laura Melne;
• fotografa Igora Pliča rodūšuos darbeibys davums Preilim i Latgolai;
• pietneica, muokslys zynuotneica Rūta Kaminska par Latgolys sakralū montuojumu i cyti stuosti.

Kai vysod žurnalā “A12” ari portala lakuga.lv sagataveituo informaceja par jaunumim latgaliskajā muzykā – itūreiz grupys “Rupuči”, “Cegly” i “MKH41” digitalī albumi i miksteipi.

Atguodynojam, ka ari iz prīšku žurnals ir vareiba izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Vaira par vareibu abonēt voi nūpierkt (kai digitalā, tai taustomā veidā) žurnalu ite: https://a12.lv.