Rokstu sagataveja: portals lakuga.lv

Rēzeknis nūvoda pošvaļdeiba sadarbeibā ar Latgolys fotografu bīdreibu nu 17. da 19. juņa reikoj fotopleneru, kurā aicynuoti pīsadaleit profesionali fotografi i fotoentuziasti nu vysys Latvejis, informej Rēzeknis nūvoda puorstuove Madara Bērtiņa. Fotografi varēs īmyužynuot vosorys kruošņumu, daudzveideibu, ainovys, pasuokumus, lauku dorbus i cylvākus Rēzeknis nūvoda pīcūs pogostūs: Kaunatys, Čornuos, Greiškānu, Stolerovys i Muokūņkolna pogostā.

17. junī, piec īsakuortuošonys nakts sātā Kaunatys vydsškolys internatā, 16.00 stuņdēs nūtiks pasuokuma atkluošona, fotografu sadale pa pogostim i īsapazeišona ar gidim – vītejim dzeivuotuojim, kuri plenera laikā fotografim paruodeis interesantuokuos vītys, viesturis objektus, latgaliskuos tradicejis, dobys boguoteibys i cylvākus. Ari sastdiņ, 18. junī, vysys dīnys garumā fotografim byus vareiba aplīcynuot sovu talantu, prasmis i naparostū redzīni, īmyužynojūt vosorys skaistumu izvālātajūs Rēzeknis nūvoda pogostūs.

Taipat i pīktdīnis, i sastdīnis vokorā planavuotys dažaidys lekcejis, prezentacejis i diskusejis par daudzpuseigū fotomuokslu i tehnologeju. Fotografi, kuri grybātu ruodeit prezentacejis voi uzrunuot kolegus, losūt lekcejis par dažaidom ar fotografeju saisteitom temom, aicynuoti dasasaceit da 1. maja pi Igora Pliča (tel. 29121689, e-posts: lauraplus@inbox.lv). Leidza var jimt vysaiduokys sovys fotografejis improvizātai izstuodei.

Daleibai plenerā juodasasoka da 10. maja, nūsyutūt dasacejuma anketu iz e-postu lauraplus@inbox.lv voi zvonūt 29121689 (Igors Pličs). Daleiba plenerā ir bez moksys. Nakts sātu i ādynuošonu fotoplenera dalinīkim nūdrūsynuos organizatori. Planavuotais dalinīku skaits nabyus leluoks par 50, partū organizatori aicynoj dasasaceišonu naatlikt.

Fotografim juobyut gotovim Rēzeknis nūvodam duovuot apstruoduotu fotografeju failus, kuri uzjimti plenera laikā. Tūs pošvaļdeiba varēs izmontuot nakomercialūs izdavumūs, sātyslopā i reklamuos, nūruodūt autoru. Paradzātys ari plenera izstuodis kotra īsaisteituo pogosta kulturys nomā, kai ari Rēzeknis nūvoda pošvaļdeibys administracejis ākā. Lobuokūs dorbu autori sajims ari pateiceibys bolvys.