Baļtinovys Muzykys i muokslys škola nūsvietejuse 25 godu jubileju

Baļtinovys Muzykys i muokslys škola nūsvietejuse 25 godu jubileju

Rokstu sagataveja: portals lakuga.lv

7. majā tyka svieteits Baļtinovys Muzykys i muokslys školys 25 godu jubilejs, informej školys puorstuovi. Svātkūs ar prīšknasumim sveice audziekni, kai ari absolventi kai kluotīnē, tai attuolynuotai nu taidu vaļstu kai Jaunzelande i Norvegeja.

Par nasavteigu dorbu i īguļdejumu Latvejis kulturā Latvejis Nacionaluo kulturys centra (LNKC) puorstuove Ruta Cibule pasnēdze gūda rokstu klavīrspēlis školuotuojai Romualdai Dāvidai. LNKC atzineibys rokstus sajēme ilggadejuo vizuali plastiskuos muokslys školuotuoja Lilita Kūkoja i pyušaminstrumentu spēlis školuotuojs Aigars Bukšs.

Ar sveicīnim beja īsaroduši puorstuovi nu Bolvu nūvoda dūmis i Bolvu nūvoda pošvaļdeibys Izgleiteibys puorvaļdis. Bolvu nūvoda Izgleiteibys puorvaļdis vadeituoja Inese Circene runā pastreipuoja, cik cīši Bolvu nūvods lepojās, ka tymā ir vasalys treis muzykys i muokslys školys i vareibys jaunīšim atteisteit sovus talantus sevkurā nūvoda pusē.

Ar sveicīnim beja īsaroduši ari kolegi nu Bolvu, Viļakys, Ludzys, Kuorsovys muzykys i muokslys školu, attuolynuoti sveicīni tyka syuteiti nu Juoņa Ivanova Rēzeknis muzykys vydsškolys i Zylupis Muzykys i muokslys školys, sveicieju vydā beja ari Baļtinovys vydsškola, kai ari sveice bejušī kolegi i absolventi. “Kab napuorsamej tradicejis i sasagloboj latgaliskuos vierteibys!” nūvielēja Kuorsovys Muzykys i muokslys školys direktore Vera Krišāne.

Baļtinovys Rūmys katuoļu draudzis pravests Filips Davidovičs apsveikuma runā pastreipuoja, ka sovim draugim i rodim Pūlejā vysod stuosta, cik cīši lepojās ar itū unikalū faktu – mozajā cīmatā Baļtinovā ir pošim sova muzykys i muokslys škola. Tei ir lela boguoteiba, kas pīpylda jaunīšu gora pasauli. 

Muzykys i muokslys školys direktore Marija Bukša sovā runā pasasaceja vysim ilggadejim atbaļsteituojim, školys dybynuotuojim i uzturātuojim, kas ir paleidziejuši školai pastuovēt i atsateisteit. “Jau 25 godus latgalīšu speits i inteligence ir tuos muzykys i muokslys školys eipašeibys, kas itū pīrūbeža jūslu ir boguotynuojušys i veiduojušys par vīnu nu leluokūs Bolvu nūvoda kulturys centru. Kotrys myusu audzieknis ir myusu byušona iz prīšku. Jis navar sovu augšonu atlikt iz kaidu cytu laiku voi labvieleiguokim apstuoklim, mums juovuica bārni ite i niu. Kvalitativa izgleiteiba i paplašynuots redzis lūks – tys ir vysleluokais vairūgs pret gora nabadzeibu.”

Galerejā Baļtinovys Muzykys i muokslys školys 25 godu jubilejis koncerts, foto Vilhelms Laganovskis

Print Friendly, PDF & Email

Nūtikšonu kalendars

Sep
26
Pyr
17:00 LTG i ES. Dzeivuos sarunys. Eiro... @ Latgolys Centraluo biblioteka
LTG i ES. Dzeivuos sarunys. Eiro... @ Latgolys Centraluo biblioteka
Sep 26 @ 17:00 – 20:00
Pyrmūdiņ, 26. septembrī, “Europe Direct Dienvidlatgale” centrs, bīdreiba “LgSC” i Eiropys Savīneibys informacejis punkts Daugovpilī aicynoj iz Eiropys Volūdu dīnai veļteitu nūtykumu “LTG i ES. Dzeivuos sarunys” Daugovpilī, Latgolys Centralajā bibliotekā. Pasuocīņa laikā dzeivuos bibliotekys[...]
Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Oct
1
Sai
vysu dīnu Izstuode “Jura Gaigala akvareļi” @ Latgolys Kulturviesturis muzejs
Izstuode “Jura Gaigala akvareļi” @ Latgolys Kulturviesturis muzejs
Oct 1 vysu dīnu
Nu 21. septembra da 1. oktobra Latgolys Kulturviesturis muzejā apsaverama izstuode “Jura Gaigala akvareļi”. Ceļojūšuo izstuode veļteita gruomotys “Jura Gaigala varavīksne” izīšonys svātkim. Tiks izstuodeitys muokslinīka akvareļgleznys nu meitys Dacis Gaigalys kolekcejis.