Rokstu sagataveja: portals lakuga.lv

Itūmienes izguojušajā repera Artura Skuteļa albumā “Jā” īkļauta ari dzīsme “Bēgums”, kas veiduota sadarbeibā ar latgalīšu reperi Ūgu. Tamā skaņ ari myužeibā aizguojušuo repera Rolexus (Runu Zāle) 2004. goda intervejis fragments.

Ūga stuosta, ka Artura Skuteļa i apvīneibys “Ausmeņa Records” sadarbeiba izaveiduojuse jau pyrma vairuoku godu. Jī asūt īsiļdejuši reperi kaidā nu juo Reigys koncertu, piec tam ari Skutelis kūpā ar grupu “Tvērumi” uzastuojuši Rēzeknis “Ausmeņa Kebabā”. Kod pi Latvejis hip-hopa apvuoršņa ir pasaruodejuse Ūga, ari jei tykuse īvāruota i paaicynuota īsiļdeit Artura Skuteļa īprīškejuo albuma “Lavīna” prezentacejis koncertu Olyuksnā.

Pīduovuojumu veiduot fītu aba sadarbeibu Ūga sajāmuse ar prīcu. “Cik asmu vāruojuse Skuteļa darbeibu, jam nav bejs nivīnys sadarbeibys ar sīvīšu puorstuovi reperi. Maņ ir cīši lels gūds, ka, pa manim, asmu pyrmuo, ar kuru jam ir fīts taišni kai ar reperi.”

Arturs Skutelis nūruoda, ka izavieliejs veiduot sadarbeibu ar Ūgu, partū ka jam cīši pateik juos muzyka. “Tys ir cīši gūdeigs hip-hops, kura autore labi puorzynoj kai latvīšu, tai uorzemu repa tradicejis, vīnlaikus sovā skaniejumā īlaižūt ari dzymtuos pusis melodejis. Ir desmitim latvīšu reperu, kuri skaņ vīnaiž, koč i īt nu vysaidu Latvejis molu; tok, kod es dzieržu Ūgu, es dzieržu Latgolu, tuos sātys i kuormus, mežus i upis, es dzieržu pīdereibu i ituos pīdereibys reprezentiešonu. Itaidi aspekti – individualitatis i dzymtuos pusis izdzīduošona – maņ ir cīši svareigi, tī ir hip-hopa kai kulturys epicentrā. Asmu cīši pateiceigs Ūgai par vareibu īraksteit kūpeigu skaņdorbu.”

Interesants bejs dzīsmis tapšonys process. Skutelis atbraucs iz “Ausmeņa Records” studeju Rēzeknē, kur Ūga īrakstejuse sovu daļu, tok juo daļu repere izdzierdiejuse tik puors dīnu pyrma albuma “Jā” izīšonys. Ūga kai eipašuo gaška ar sovu soloprogramu pīsadaleja ari albuma prezentacejis lelkoncertā Reigā, koncertzalē “Palladium”. “Beju cīši saviļņuota, tik lela zale maņ nikod vēļ nabeja bejuse. Vēļ ari lels gūds, ka varieju byut ar vacajim bukim aizskotuvē. Tok es jutūs kai zivs iudinī. Paļdis Arturam, ka jis mani paaicynuoja! Itys pasuokums myus satyvynuoja kai kolegus, sajutu juo lepnumu par sovu albumu, jutu leidza vysam tam pyuļam. Tys beja lels nūtykums jam. Sajutu kai atbiļdeibu, tai tū breineigū svātku sajiutu,” emocejuos doluos Ūga.

Ūga nasliep, ka dreizumā nu juos var sagaideit ari cytus jaunumus. Par pīmāru, jau reit, 1. junī, izīs dzīduotuoja Jāņa Šipkēvica soloalbums, kurā byus ari juo kūpeiga dzīsme ar Ūgu.