Kroma kolna bruoliste svieteis 10 godu jubileju

Kroma kolna bruoliste svieteis 10 godu jubileju

Rokstu sagataveja: portals lakuga.lv

Kroma kolna bruoliste ir bīdreiba, kas dybynuota 2012. godā. Bīdreibys aizsuokumi meklejami dažu viesturis entuziastu sarunuos par vajadzeibu dziļuok pieteit sovys saknis, Latgolys viesturis vēļ naapzynuotūs aspektus, vairuok apsaverūt latgaļu senviesturi pyrma kristīteibys īīšonys Latvejis teritorejā. Itūgod, 20. augustā, bruoliste svieteis 10 godu jubileju.

Kroma kolna bruolistis dybynuotuojs ir Aleksandrs Lubāns, itūšaļt bruolistē darbojās ap 30 bīdru nu dažaidim Latgolys nūvodim. Bruoliste ir suokuse dorbu pi senejūs latgaļu ciļšu kūka piļs rekonstrukcejis. Itūšaļt tei ir vīta, kur bruolistis bīdri sasateik vysmoz reizi mienesī, kab apsamaineit ar jaunuokū informaceju kai saisteibā ar viesturis pieteišonu, tai ari par plānuotuom aktivitatem. Bruolistis bīdri sasapuļcej ari iz tolkom, kab kūpeigi struoduotu pi īsuoktuos sovys latgaļu kūka piļs uzceļšonys tepat Latgolā.

Kotra goda prīškpādejā augusta nedelā Kroma kolnā nūteik kasgadejī Kroma kolna svātki, kod kūpā saīt vysi bīdri, bīdreibys draugi i interesenti. Svātku laikā teik gūdynuoti aktivuokī bīdreibys bīdri, izejūt vysaidus puorbaudejumus, teik uzjimti ari jauni bīdri.

Itymā godā bruoliste svieteis 10 godu jubileju, deļtam svātki sūluos byut eipaši kruošni.

Svātku programa:

  • 15.00 Svātku suokums. Svātku īkustynuošona ar guņs īkūršonu i svineigom uzrunom.
  • 17.00 Karaveiru ceinis. Senejī karaveiri nu Leitovys i Latvejis.
  • 18.00 Stuosti par arheologiskajim taututārpim. Stuosti par latgaļu un vikingu apgierbim.
  • 19.00 Karaveiru ceiņu finals.
  • 20.00 Leļu teatris par Piļskolnu pi Pušys. Teika pīraksteita nu Teklas Butleres vuordim 1928. godā.
  • 21.00 Leluo vysu karaveiru kauja-bugurts.
  • 22.00 Svātku nūslāgums. Svātki nūsaslādz ar apbolvuošonu i ar guņs skulpturys aizdegšonu.

Svātku gosti byus Folklorys kūpa “Ilža” (LV), Ludzys amatnīku centrs (LV), Brīžucīma ols (LV), Martynas Stankus (LT), kaļvs Edita Nurmi (LT), vydslaiku iedīņu gataveišonys demonstriejumi Gediminas Kairys (LT) i cyti amatnīki. Karaveiru Klubi: ”Robeža” (LV), “Pilsots” (LT), “Pajauta” (LT), “Semigallia” (LT), “Kroma Kolna Bruoliste” (LV) i cyti karaveiri.

Pasuokums Facebook apsaverams ITE.



Print Friendly, PDF & Email

Nūtikšonu kalendars

Jan
28
Sai
12:00 Puorguojīņs pa Rēzekni “Piļsāta ... @ Rēzekne
Puorguojīņs pa Rēzekni “Piļsāta ... @ Rēzekne
Jan 28 @ 12:00 – 15:00
28.janvarī gaidoms puorguojīņs pa Rēzekni “Piļsāta pi upis i storp stacejom”. Plānuots apmāram 3 stuņžu laikā nūīt ap 7 kilometrim. Tū suoks pi dzeļžaceļa stacejis “Rēzekne II”, varēs izzynuot, ar kū tei ir seviška. Tuoļuok[...]
21:00 “Muzikālā banka 2022” @ Daugovpiļs Olimpiskais centrs
“Muzikālā banka 2022” @ Daugovpiļs Olimpiskais centrs
Jan 28 @ 21:00 – 23:30
Daugovpiļs Olimpiskajā centrā otkon nūtiks Latvejis Radejis 2 goda vierteiguokūs pop i rokdzīšmu aptaujis “Muzikālā banka 2022” apbolvuošonys ceremoneja. Jau īrostai “Muzikālās Bankas” finala koncertšovs byus dinamiski kruošņs, muzykali vierīneigs i īspaideigs, pīsadolūt aizvadeituo gods Latvejis[...]