Jauna kulturvīta Rēzeknē – Breivvaļsts duorgumu noms (+FOTO)

Jauna kulturvīta Rēzeknē – Breivvaļsts duorgumu noms (+FOTO)

Rokstu sagataveja: portals lakuga.lv

5. augustā, piļsātys svātku laikā, Rēzekne palyka par vēļ vīnu kulturvītu boguotuoka. Kuorms sūpluok Rēzeknis piļskolnam, kas daudzus godus stuovēja tukšs i nalobā stuovūklī,  pīdzeivuojs cīši lelys puorvierteibys – tī niu attaiseits Breivvaļsts duorgumu noms, kurā eksponāti prīškmati i muokslys dorbi nu Latvejis i uorzemu privatkolekceju, kas viestej par laiku nu Latvejis Republikys proklamiešonys 1918. godā da Ūtruo pasauļa kara suoku.

Breivvaļsts duorgumu noms tyka atkluots ar apsveikuma runom, gareidznīku svieteibu i svineigu leņteitis puorgrīzšonu. Tuo apkolpuotuojs kolekcionars Juoņs Vigups nūruodeja iz Rēzeknis eipašū lūmu Latvejis viesturē – taišni te nūtyka 1917. goda Latgolys kongress, kurs lika pamatus vaļsts izveidei, itamā apleicīnē nūtyka nūzeimeigi Naatkareibys kara nūtykumi, kai ari piec tam tys izaveiduoja par nūzeimeigu centru. Tū vysu varēs redzēt i nūviertēt ari ekspozicejā. Breivvaļsts duorgumu noma vadeituoja Jolanta Leitāne atzyna, ka jaunuo kulturvīta nas cīši spieceigu viestejumu par myusu vaļsti i tuos cylvāku liktinim. Tys ir nūzeimeigs montuojums, kū jī gryb ruodeit sabīdreibai i tū izgleituot, patriotiski audzynuot jaunū paaudzi.

Ekspozicejā ir unikala vareiba apsavērt Latvejis vaļsts, militarūs vīneibu, policejis, rūbežsardzis, kai ari leluokūs Latvejis organizaceju i bīdreibu apbolvuojumus, medalis, kryušu nūzeimis, dokumentus, kartenis, formys i cytys interesantys, vierteigys i rešys viesturis līceibys. Atseviška izstuodis daļa ir veļteita latvīšu strieļnīkim, kuri kai nacionalys bruņuotys vīneibys tyka organizātys Krīvejis imperejis sastuovā i pīsadaleja Pyrmajā pasauļa karā. Piec Latvejis vaļsts izveiduošonys lela daļa strieļnīku īsastuoja tuos bruņuotajūs spākūs i pīsadaleja Latvejis Naatkareibys karā. Lela daļa eksponatu ir saisteiti ar Latgolys regionu i Rēzeknis piļsātu, par pīmāru Rēzeknis piļsātys golvys omota kēde, latgalīšu politikam i sabīdryskajam darbinīkam Jezupam Rubuļam pīškiertais 3. škirys Luočplieša kara ordiņs voi vysaiduoku pasuokumu afišys.

Sovpus ūtruo stuova Boltajā zalē apsavieršonai teik pīduovuotys Latgolys muokslinīku gleznys, kai ari gleznys, kuruos atainuotys Latgolys ainovys. Apsaveramūs muokslys dorbu autori ir Osvalds Zvejsalnieks, Arvīds Egle, Jūlijs Viļumanis, Francisks Varslavāns, Alberts Filka, Staņislavs Diņgelis, Vitālijs Kalvāns, Varis Vekters, Pāvils Glaudāns, Jānis Lauva, Niklāvs Strunke, Jānis Audriņš i Stanislavs Kreics.

Planavuots, ka itei ir tik pyrmuo ekspoziceja, tok iz prīšku tuos varātu tikt maineitys i papyldynuotys ar jaunim eksponatim.

Galerejā: Breivvaļsts duorgumu noma atkluošona. Foto autore: Amanda Anusāne/portals lakuga.lv

Print Friendly, PDF & Email

Nūtikšonu kalendars

Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Sep
29
Cat
15:00 Viesturis šaļteņu pītura “Latvij... @ Latgolys Kulturviesturis muzejs
Viesturis šaļteņu pītura “Latvij... @ Latgolys Kulturviesturis muzejs
Sep 29 @ 15:00 – 17:00
Itūšaļt Latvejā ir pyrma vieliešonu laiks, kod pylsūni lem, par kuru nu deputatu kandidatu sarokstim atdūt sovu bolsu. Ari pyrma 100 godu 1922. goda 7. i 8. oktobrī riezeknīši, kai ari vysys Latgolys i Latvejis[...]