Rokstu sagataveja: portals lakuga.lv

Itūnedeļ Bolvu nūvoda Rekovys vydsškolā suoksīs jaunīšu latgaliskais seminars “Atzolys”, kurā byus vareiba sasatikt ar latgaliskajā vidē aktivim ļaudim, izzynuot vaira par breivpruoteigū dorbu, kai ari, saprūtams,vaira runuot i raksteit latgaliski. Ituos nedelis kulturys īsacejumim uzrunuojom vīnu nu poša pyrmuo seminara “Atzolys” (kas nūtyka 2004. godā Kuorsovā) dalinīku – Latgolā lobuok zynomu kai grupys “Borowa MC” muziki Aigaru Runči.

Atguodojūt sovu pīsadaleišonu jaunīšu seminarā “Atzolys”, Aigars soka: “Tys beja seņ, bet beja taisneiba! “Atzoluos” es tai eistyn apsazynuoju, ka latgaliskais nav svareigs tik maņ, bet ari daudzim cytim leidzeigi dūmojūšim jaunīšim, i ka latgaliskajā i myusūs ir taids spāks! “Atzoluos” es īpasazynu ar sovu sīvu, īpasazynu ar Ingaru (Gusānu – red.), ar kuru dreiž piec tam kūpā suocem raksteit dzīsmis i ar “Atzolu” jaunīšim par reizi piec nūmetnis mes kūpā uzastuojom i ar “Borowa MC” uzvarējom festivalā “Osvalds”. Breineigs laiks, viņ gryuts nūticēt, ka tys beja tik seņ…” Īsavieršonai ari pyrmajuos “Atzoluos” Aigars pīduovoj ari puora fotokadrus, sokūt, ka biļdis ir burtiski puorfotografātys, jo tūlaik jau taidu teleponu nabeja.

Itai nedeļai i vosorai, cik vēļ tuos ir palics, Aigars īsoka itaidys aktivitatis i doromuos lītys:

Atrakceju ci izzynūšī parki sasajusšonai kai bārnam

Sasajust pošam kai bārnam i nūdarbynuot bārnus iz vysu dīnu!? Ar sovim bārnim lobpruot braucu iz dažaidim atrakceju, kai ari izzynūšajim parkim, kur var izatrokuot dažaiduos atrakcejuos. Ka saīt byut Reigys pusē, tod īsoku nūīt iz “Skypark” tierdznīceibys centrā “Domina” (tī pīaugušajim, kas pavoda bārnus, īīšonys moksa ir diveji eiro). Ka brauc iz Reigu nu Rēzeknis i Daugovpiļs pusis, tod pa ceļam, saprūtams, ir “AB Parks”, bet, ka asat gotovi braukt garuoku ceļa gobolu, tod jauns aizraunūšs parks ir “Vizium” Ventspilī.

Fotoseseja vosorys sagiušonai

Kai reizi saceja vīnā reklamā, vosora nav eisa – vosora ir uotra, kod juoīspiej i juopīdzeivoj cik daudz! Mes saimē raugam īmyužynuot, kai mes izaveram i jiutamīs, deļtuo raugam sareikuot kaidys fotosesejis – dobā voi kaidā interesantā vidē. Piečuok ituos kartenis cīši labi nūdar duovonom babom i rodim.

Stuojitēs zemissardzē!

Nu ituo gods breivdīnu planūs jo eipaši īsoku atrast laiku ari zemissardzei. Itys ir nūzeimeigs i breivpruoteigs sūļs, ar kuru puorbaudeit sevi, nu reizē īsavuiceit ari daudzi kuo jauna.

Vosorys koncerti

Itūvosor koncertu vysapleik ir tik daudzi i vysi tik lobi! I lobuokais, ka koncerti kotram ir tik tyvai kai nikod – patiemejit nūtikšonu afišā i nūteikti atsarass lobuokais sev, jo nūteik VYSS! Ari mes ar “Borowu MC” tikū pīsadalejom Rēzeknis svātkūs – tik breineigs i aizrauteigs koncerts, bejom sasailguojuši vīns piec ūtra (kai grupys bīdrim, tai klauseituojim).

Ekskurseja ar gidu Daugovpiļs skrošu ryupneicā

Itūvosor ar saimi bejom Daugovpiļs skrūšu ryupneicā. Tik švaki sasajutu par tū, ka nazyn par kū tī da ituo nabeju bejs agruok! Tik autentiska i aizraunūša vīta, kur gids (kurū obligati īsoku) paleidzēja izzynuot skrošu ražuošonys procesu i dažaidys nūtikšonys ap ryupneicu kai niu, tai nu viesturis puslopu. Ekskurseja tī beja izcyli pavadeits laiks!