Školānus i studentus aicynoj pīsadaleit konkursā “Muna breiveibys cena”

Školānus i studentus aicynoj pīsadaleit konkursā “Muna breiveibys cena”

Rokstu sagataveja: portals lakuga.lv

Sevkurys klasis školāns voi studejūšais jaunīts teik aicynuots pīsadaleit rokstu dorbu konkursā “Muna breiveibys cena”, tai viestej konkursa organizatori – Publiskūs tīseibu instituts, Latvejis Politologu bīdreiba, Viesturis i socialūs zineibu školuotuoju bīdreiba, Latvejis Universitate i Reigys Stradiņa universitate.

Rokstu dorbu tema ir “Muna breiveibys cena”, vīna dorba apjūms ni vaira kai 5000 rokstu zeimu, vālams pīvīnuot ari paskaidrojūšu video (20-30 sekuņdis). Rokstu dorbus konkursam var syuteit iz democracy.week.Latvia@gmail.com.
Rezultati tiks paziņuoti 18. novembrī 18.18 stuņdēs Facebook grupā “demokrātijasnedēļa 2022”.

Dorbus var īsnēgt latvīšu literarajā, latgalīšu rokstu volūdā voi lībīšu volūdā. Lībīšu volūdā īsnāgtim dorbim vālams pīvīnuot tulkuojumu. Dorbūs tiks vārtāta autora izpratne par demokratisku sabīdreibu, izteiksmis forma, satura i formys originalitate. Studejūšūs dorbus anonimi viertēs gimnazeju školuotuoji, cikom školānu – augstškolu docātuoji.

Dorbu īsniegšonys termiņš – leidz Satversmis spākā stuošonuos breiža symtajai godadīnai. Kai papyldynoj vīns nu konkursa organizatoru Arvīds Dravnieks: “Satversmei itūgod symtuo godadīna, tei pījimta 1922. gods 15. februarī, izsludynuota 30. junī eipašā “Vaļdeibys viestneša” izdavumā i stuojuos spākā leidz ar 1. Saeimys saīšonu. Tys ir ari konkursa dalinīku pyrmais aizdavums – nūskaidruot, kurā datumā iz sovu pyrmū sēdi saguoja 1. Saeima.”

Arvīds Dravnieks ari stuosta, ka konkursa izveidis ideja roduos pavasarī, kod pandemejis deļ beja atcalti daudzi pasuokumi. “Vairuokys bīdreibys sareikuoja tīšsaistis sarunys mieneša garumā par Satversmis sapuļcis viesturi i eseju konkursu. Daži dalinīki konkursā pīsadola atkuortuoti, deļtam pārnejā godā tyka dūta vareiba pīsadaleit ari studentim.” Arvīds ari papyldynoj, ka itūgod konkursa dalinīkim ir vareiba īsnēgt sovu dorbu ari video formatā, tai kai myusu dīnuos cytim jaunīšim veiduot TikTok video pasadūd vīgļuok, nakai raksteit.

“Konkursa dorbus var īsnēgt latvīšu literarajā, latgalīšu rokstu volūdā voi lībīšu volūduos, partū ka Latvejis Republikys Satversmis 4. pants aizsorgoj pyrmīdzeivuotuoju lībīšu i ari latgalīšu volūdu i kulturu. Pyrma sešu godu kūpā ar Eiropys Tīsys tīsnesi Egilu Levitu raudzejom par tū puorlīcynuot symtgadis kongresa dalinīkus Rēzeknē. Itūšaļt ari Reigā daudzim juristim ir skaidrs, ka latvīšu volūdai ir divejis rokstu aba literaruos volūdys formys – baļtīšu aba standarta LVS i latgalīšu. Prūti, LAV=LVS+LTG,” tai vīns nu konkursa organizatoru Arvīds Dravnieks.

Rokstu dorbu konkursu organizej Publiskūs tīseibu instituts (Arvīds Dravnieks), Latvejis Politologu bīdreiba (Iveta Reinholde), Viesturis i socialūs zineibu školuotuoju bīdreiba (Baiba Atmane), Latvejis Universitate (Agris Bitāns, Ivars Ījabs, Lauris Liepa, Jānis Pleps), Reigys Stradiņa universitate (Kitija Bite, Jānis Grasis).

Konkursa laureatim ir vareiba tikt pi bolvu:

  • (a) Saruna ar sevkuru Latvejis vaļsts amatpersonu i īpasazeišonys ekskurseja īstuodē piec izgleituojamuo izvielis. Laureats varēs izavielēt ari leidzbraucieju – sovu meiluokū školuotuoju voi cytu tyvinīku. Leidz šam nivīna amatpersona nav atsacejuse tikšonūs; popularuokī sarunu partneri bejuši Vaļsts prezidents, Saeimys prīšksādātuojs i juo bīdri, izgleiteibys ministrs i sovys pošvaļdeibys vadeituojs. Daleibu naatsaceis ari tīsu varys īstuožu voi augstškolu vadeituoji.
  • (b) Vīnam studentam, pylngadeigam školānam i juo izvālātam školuotuojam tikšonuos ar deputatu nu Latvejis i īpasazeišona ar Eiroparlamenta dorbu Briselē.
  • (c) Ailinīks Andris Akmentiņš kaidam školuotuojam duovynuos sovu gruomotu “Skolotāji” ar eipašu īrokstu i 10. junī Ciesīs vadeis raksteišonys meistarklasi školānim.
  • (d) Viesturis školuotuojs Artis Buks uzaicynous iz sastdīnis viesturis školu školānus i jūs školuotuojus 10. junī sarunu festivalā LAMPA.
  • (e) Izcylnīkim byus īspieja pīsadaleit konkursa organizatoru reikuotajūs pasuokumūs – sarunu festivalā LAMPA 9. i 10. junī, Bīriņu konstitucionaluos tīseibpolitikys seminara vosorys školā 24. julī i jaunūs lideru forumā.
  • (f) Vysim dorbu autorim latgalīšu voi lībīšu volūdā duovonā tiks Satversme latgalīšu i lībīšu volūduos.
  • (g) Vārtātuoji (gimnazeju školuotuoji i augstškolu docātuoji) duovynuos kaidu sovu gruomotu ar īrokstu.
Print Friendly, PDF & Email

Kalenders

Apr
16
Ūtr
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Apr 16 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]
Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]