Botaniskajā duorzā Salaspilī nūtiks Ligijis Purinašys dzejis kruojuma prezentaceja

Botaniskajā duorzā Salaspilī nūtiks Ligijis Purinašys dzejis kruojuma prezentaceja

Rokstu sagataveja: portals lakuga.lv

26. novembrī 13.33 stuņdēs (10 minutys piec dizeļviļcīņa Reiga-Daugovpiļs ībraukšonys Salaspiļs dzeļžaceļa stacejā) Nacionaluo Botaniskuo duorza oranžerejā (Salaspilī, Mīra īlā 1) nūtiks Ligijis Purinašys ūtruo dzejis kruojuma “pierobežas” eksotiskī skaitejumi.

Kab tyktu oranžerejā, apmaklātuojim byus juozyna parole, kas tiks izsyuteita dīnu pyrma pasuokuma. Partū teik lyugts pīregistrēt sovu daleibu ITE. Ligija Purinaša soka, ka tys ir kai intrigai, tai ari praktisku īmaslu dieļ – tys mudynuos iz pasuokumu atīt tūs, kas ir eistyn tam motivāti, taipat ļaus īprīšk zynuot apmaklātuoju skaitu, kai ari dūs jim vareibu tikt Botaniskajā duorzā par breivu, cytaiž byutu juopierk belets.

Pasuokumā pīsadaleis ari latgalīšu literats Raibīs, kurs “saceis dažus vuordus par safari i tuo nūzeimi kulturys nūtikšonuos”, i tulkuotuojs Džeids Vils (Jayde Will), kurs pasadaleis sovūs īspaidūs i pīredzē par tulkuošonu. Pasuokuma dalinīki byus ari līcinīki Ligijis Purinašys i repera Bruolāna kūpeigajai performancei, taipat Bruolāns ļaus īsavērt sovā jaunajā albumā “Bagaža”, kas sadarbeibā ar Jezupu izīs ituo gods decembrī. Ligija soka, ka jei cīši gryb itymā pasuokumā akcentēt komunikaceju, kurys izaicynūšuo pandemejis laika attuolynuotajā dzeivē mums ir pītryucs.

Ligija stuosta, ka itei pagaidom ir paradzāta kai vīneiguo kruojuma prezentaceja, atseviška nūtikšona Latgolā naasūt plānuota. “Ka byus pīprasejums voi kaida forša ideja prezentacejai, mes nūteikti tai ļausimēs, bet specialys prezentacejis Latgolā vysmoz tyvuokajā laikā nabyus. Salaspiļs Botaniskais duorzs tyka izvālāts par tū, ka ir sajiuta, ka latgalīšu kulturai i literaturai kai daļai nu latvīšu kulturys i literaturys vajag specifiski eipatnejus apstuokļus, lai jei varātu atsateisteit. Nu ūtrys pusis, maņ ari itys gods ir paguojs sovūs vysaidūs augšonys režimūs. Taids zaļuošonys, lopu nūmesšonys, puormaiņu laiks. Maņ itūgod ir taida syltumneicys, oranžerejis sajiuta,” Ligija pamatoj lasejumu vītys izvieli.

Vaira par dzejis kruojumu “pierobežas” var puorskaiteit ITE, sovpus ITE atrūnama dzejneicys Ingys Pizānis recenzeja par tū. Gruomotu īspiejams nūpierkt “Volūdu sātā” i “Jānis Roze” internetveikalā.

Pasuokuma organizatori breidynoj, ka puču i cytu augu īnesšona oranžerejis telpuos ir aizlīgta.

Print Friendly, PDF & Email