Aicynoj iz Namaterialuo kulturys montuojuma svātkim “Gūdi”

Aicynoj iz Namaterialuo kulturys montuojuma svātkim “Gūdi”

Rokstu sagataveja: portals lakuga.lv

3. decembrī Bolvu nūvodā jau trešū reizi svieteis Namaterialuo kulturys montuojuma svātkus “Gūdi”, informej Namaterialuos kulturys montuojuma centra “Upīte” direktors Andris Slišāns. Atzeimejūt četru godu jubileju kai Upītis kulturtelpa īkļauta Nacionalajā namaterialuo kulturys montuojuma sarokstā, tiks pasaceiti paļdis ituos pusis namaterialuos kulturys veicynuotuojim, atbaļsteituojim i leidza jutiejim. Svātkus reikoj Bolvu nūvoda Namaterialuos kulturys montuojuma centrs “Upīte”, tok tī nūtiks Škilbānu pogosta kulturys centrā “Rekova”.

Upītis kulturtelpa, kas pyrma četru godu tyka īkļauta Nacionalajā namaterialuo kulturys montuojuma sarokstā, ir daļa nu viesturiskuo Abrinis apriņča i unikala ar saglobuotū i dzeivū Zīmeļlatgolys latvīšu (latgalīšu) kulturys montuojumu, tradicejom i volūdu. Upītis kulturtelpys suokys — 20. gs. 30. godi, bet 40.–50. godūs, veidojūtīs kolhozim, tyka radeits īdeiglis Upītis cīmam, kas atsarūn centrā vacajai kulturtelpai, kū veidoj lelī cīmi. Upīte ir zynoma ar Zīmeļlatgolai rakstureiguo folklorys montuojuma saglobuošonu i aktivu populariziešonu. Tei ir dzejnīka i nūvodpietnīka Ontona Slišāna darbeibys vīta. Myusu dīnuos Upīte ir vīna nu aktivuokūs latgaliskūs nūtikšonu vītu Latvejā, reikojūt vacuokū latgalīšu dzejis i muzykys festivalu “Upītes Uobeļduorzs”, storptautyskū folklorys festivalu “Lipa kust” i cytys nūtikšonys.

Kab gūdynuotu ituos kulturtelpys kūpiejus, veicynuotuojus, atbaļsteituojus i leidza jutiejus, trešū reizi Bolvu nūvodā teik reikuoti leli svātki “Gūdi”, kurūs vēļ nabejušā veidā sasaveis tradicionalais ar myusdīneigū kai mutvuordu i amatnīceibys, tai kulinarajā Upītis kulturtelpys montuojumā. Svātku koncertā 3. decembrī 19.00 stuņdēs pīsadaleis kūklis virtuoze Laima Jansone i DJ Monsta projektā ZeMe, grupys “Dabasu Durovys” solists Arņs Slobožanins, folklorys kūpa “Upīte”, bārnu folklorys kūpa “Upīte”, grupa “Unknown Artist” i Škilbānu pogosta legendaruos rokgrupys “Karburators” liders Vilis Cibulis, bet koncertu vadeis Upītis kulturtelpys liders Andris Slišāns i juo treis dāli. Piec koncerta svineiguos dalis varēs izadoncuot kūpā ar Artūru Jauntēvu i juo pavodūšū grupu.

Itūgod svātki nūtiks Škilbānu pogosta kulturys centrā “Rekova”, jo Bolvu nūvoda Nematerialuos kulturys montuojuma centrs “Upīte” ir sagaidejs senejū sapynu – nūteik ākys rekonstrukceja.

Svātkus atbolsta Latvejis Nacionalais kulturys centrs.

Print Friendly, PDF & Email

Kalenders

Apr
16
Ūtr
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Apr 16 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]