Rokstu sagataveja: portals lakuga.lv

Zīmyssvātku gaideišonys laiks ir eistuo šaļts lobim dorbim – aizbraucit gostūs pi tūs, kurim jums parosti datryukst laika, saryupejit kaidu labdareibys duovonu cylvākim vacūs ļaužu pansionatūs, kab sasiļdeit tuos sirds, kurom kasdīnā tryukst mīlesteibys i tyvu cylvāku, tai sovus īsacejumuos īsuoc Santa Ostaša – svātku agenturys “Svētku bode” saimineica i Rēzeknis nūvoda Ūzulainis pogosta Tautys noma vadeituoja.

Īnest sātā svātku sajiutu

Kotrā svātku gaideišonys dīnā īnesit pa druponai svātku sajiutys sovā sātā – cepit piparkūkys, rodit Zīmyssvātku rūtuojumus, sataisit poši sovys apsveikuma kartenis i nūsyutit tuos sovim meilajim. Sataisit svātku duovonys sovom rūkom, tradicionalūs duovonu maiseņus nūmainit iz pošu veiduotu rodūšu īsaiņuojumu, kūpeigi izdūmojit gordu svātku iedīņkarti, kluojit goldu iz grazna goldauta i izrūtojit telpys ar vysaida veida dekorim (kotru dīnu dalīkūt pa kaidam jaunam dekoram). Grīzit snīgpuorslys kai bierneibā i īleimejit tuos lūgūs, izkarit sātā zečeitis i īprīcynojit vīns ūtru ar meilym uzmaneibys aplīcynuojumim, pīrokstit jaunuo gods apsajimšonūs sarokstu, saryupejit šmuku tārpu deļ svātku, ejit iz mežu piec egleitis, jemūt leidz korstveinu i piparkūkys, aiznesit kaidu duovoneņu ari zvierenim mežā.

Kinys Zīmyssvātku nūskaņuos

Nūsaverit vysmoz treis Zīmyssvātku kinys, partū ka tuos roda breineigu svātku nūskaņuojumu i vuica mums, ka dzeivē pats golvonais ir mīlesteiba i svātku laiks ir eistuo šaļts, kab pasceit vīns ūtram lobus vuordus, eipaši, ka kasdīnys skriejīnī tam nav laika.

Zīmyssvātku koncerts

Apmeklejit kaidu nu Zīmyssvātku koncertu, kū pīduovoj myusu kulturys īstuodis. Ir vārts īsavērt kai lelūs kulturys nomu pīduovuojumā, tai i apsavērt, kū pīduovoj lauku kulturys nomi.

Eipašys foto sesejis

Varbyut Zīmyssvātki ir eistais laiks skaistai personeigajai foto sesejai voi jau seņ grybātai saimis foto sesejai treis voi četruos paaudzēs?

Rodit sovys svātku tradicejis

Ka jums vēļ nav nivīnys eipašys Zīmyssvātku tradicejis, rodit jaunys! Tys padareis svātkus vēļ gaideituokus. Lai jums vysim sirsneibā pīpiļdeits i skaists svātku gaideišonys laiks! Lai breineigi i sirdssylti Zīmyssvātki i laimeigs Jaunais gods!