Rokstu sagataveja: portals lakuga.lv

2. majā Latgolys viestnīceibā “Gors” nūtyka Juoņa Ivanova Rēzeknis Muzykys vydsškolys reikuotais Storptautyskais etnodžeza konkurss “Guoyu pa JAZZ”. Konkursā pīsadaleja deveni muzykas ansambli nu septeņu Latvejis i Leitovys muzykys izgleiteibys īstuožu, kūpā puļcejūt vaira par 60 dalinīku.

Konkursa golvonais mierkis beja sova regiona tradicionalūs vierteibu izceļšona i tautys muzykys elementu īkļaušona myusu dīnu muzykys žanrā. Viertejūt vysu konkursa daleibai dasaceitūs ansambļu muzykalū snāgumu, organizatori i konkursa žureja pīzyna, ka suokūtnejais mierkis ir sasnāgts. Dalinīki veiksmeigai eksperimentēja ar tautys muzykys elementu īkļaušonu myusu dīnu muzykys žanrā. Vysim ansamblim daleiba konkursā beja sova veida izaicynuojums, jo vysim dalinīkim beja juoatskaņoj div dažaida rakstura skaņdorbi: sova apvyda tautysdzīsme originalaranžiejumā i breivys izvielis skaņdorba originalaranžiejums voi originalkompoziceja, kas īkļaun etniskuos muzykys elementus. Vysys dzierdātuos kompozicejis tyka veiduotys taišni itam konkursam.

Vysu ansambļu muzykalū snāgumu viertēja profesionala žureja – Jāzepa Vītuola Latvejis Muzykys akademejis Džeza muzykys katedrys vadeituojs Indrikis Veitners, leitovīšu avangarda džeza i laikmeteiguos muzykys izpiļdeituojs Arkādijs Gotesmans (Arkadijus Gotesmanas), grupys “Tautumeitas” līdere Asnate Rancāne, kai ari Juoņa Ivanova Rēzeknis Muzykys vydsškolys džeza i myusu dīnu ritma muzykys pedagogs Kalvis Sležis-Zaļkalns.

Specbolvu par kūpejū muzykalū snāgumu sajēme “21st Century Quintet” nu Leitovys Muzykys i teatra akademejis. Specbolvu par individualū snāgumu sajēme Domantas Joknys (saksofona spēle, ansamblis “Cool Jazz Ensemble” nu Balys Dvarionas Muzykys školys), Harijs Ločmelis (trompetis spēle, ansamblis “Vilakuze” nu Līpuojis Muzykys, muokslys i dizaina vydsškolys), Marts Dreļs (tausteņinstrumentu spēle, ansamblis “Sauļeites” nu Juoņa Ivanova Rēzeknis Muzykys vydsškolys, Oskars Nejs (sytaminstrumentu spēle, ansamblis “MǬ” nu Ventspiļs Muzykys vydsškolys), Monta Cine i Aleksa Beatrise Rubīna (vokals, ansamblis “MǬ” nu Ventspiļs Muzykys vydsškolys). Specbolvu par lobuokū tautysdzīsmis aranžeju i izpiļdejumu sajēme Līna Māra Krastiņa (ansamblis “Kreisā krasta upmalnieki” nu Reigys Dūma Kora školys).

Atzineibu i bolvu nu Gunāra Igauņa muzykys instrumentu darbneicys sajēme ansamblis “Sipisnīks ar madu” nu Juoņa Ivanova Rēzeknis Muzykys vydsškolys, 3. vītu i speciali konkursam taiseitus sviļpaunīkus nu pūdnīku darbneicys “Malny Wylki” sajēme ansamblis “Sauļeites” nu Juoņa Ivanova Rēzeknis Muzykys vydsškolys, 2. vītu i Gunāra Igauņa taiseitū šamaņa bungu sajēme ansamblis “Kreisā krasta upmalnieki” nu Reigys Dūma Kora školys, bet 1. vītu i golvonū bolvu – piļneibā apmoksuotu daleibu V Baļtejis džeza festivala “Škiuņa džezs” meistarklasēs – dabuoja ansamblis “MǬ” nu Ventspiļs Muzykys vydsškolys. Latgolys viestnīceibys “Gors” simpateju bolvu i vareibu uzastuot Latgalīšu kulturys goda bolvys “Boņuks 2023” padūšonys ceremonejā sajēme Laura Svikša i ansamblis “Sipisnīks ar madu”.

Konkursa īrokstu var nūsavērt ITE.