Rasma Svikle. Intelektuali cylvāki ir kretīni

Rasma Svikle. Intelektuali cylvāki ir kretīni

Dzejūļu autore: Rasma Svikle

Pīduovojam portala lakuga.lv skaiteituojim Rasmys Sviklis dzejūļus. Autore ir obeju dzejis slamu latgaliski “Rogovkys dzejis voga” daleibneica, pārņ tymā teikūt ari lobuokūs trejnīkā.

5.00 nu reita
5.00 nu reita
saļ kuojis
juoīt slaukt gūvs
Gaujai tesmiņs
pa zemi valkās
pīns aiztak
kai laiks
nu manis
da tevis

aizaug ar zuoli
tei styga
iz vacū pierti
kur sastdīnēs
kuriejuos guņs
i varēja izdzert ols

5.00 nu reita
saļ kuojis
laiks apaug ar zuoli
deigst prīdis
piertī perās veli
i izdzer pa osorai
nu munom acim

***

Vuordi
sabierst vuordi
iz placim
kai snīgs
kai rudiņa lopys

sabierst smogums
tik vīglys
bet napanasams

kai lai nūtur
dvēseli tik teiru
i dzidru kai snīgs?

kai lai sagloboj
prīcu kruosainu
kai rudiņa lopys?

kai lai palīk
par cylvāku
kod ciļvieceibys
tik moz?

***

Kur?
vīntuļa spuļdze
pi grīstim
vīntulis zvaigznis
skaita

iz golda
izlaseita gruomota
nūdylušim styurim
tī atbiļžu nav
tik vaicuojumi

kur ir tys atslāgs
iz dabasu vuortim?

kur ir tuos vuolūdzis
kas leitu sauc?

nasasauc
nasasauc
bārnus sātā

vīntuļa spuļdze
pi grīstim
vīntulis zvaigznis
skaita

nasaskaita
tik mienessgaismā
speid bazneicys krysts

***

Lyni
muoseņ
īsiej šūgod
lynus
bārni školā
taidus napazeist

saujeņa
zylu puču
iz tovys suknis
tovi bārni
zynuos
kai izaver lyni

***

intelektuali cylvāki
ir kretīni
jī dūmoj
i vēļ runoj
pravdu
kai indi
kūž acīs
i naļaun izalikt

Print Friendly, PDF & Email

Kalenders

Apr
12
Pīk
19:00 Grupys “Galaktika” albuma prezen... @ Smiļtinis piļsātys kulturys centrs
Grupys “Galaktika” albuma prezen... @ Smiļtinis piļsātys kulturys centrs
Apr 12 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]