Grupys “Bez PVN” i Dionys dzīsme “Šaļti” tykuse aptaujis “Muzikālā banka” finalā
Rokstu sagataveja: portals lakuga.lv
Ar klauseituoju i ekspertu bolsuojuma paleidzeibu nūskaidruotys 15 dzīsmis, kas turpynuos saceņseibu par 2023. gods vierteiguokuos popa i roka dzīsmis titulu Latvejis Radejis 2 aptaujā “Muzikālā banka 2023”. Finalā, kas 27. janvarī nūtiks Daugovpilī, varēs dzierdēt ari latgalīšu volūdu, jo lobuokūs pīcpadsmitnīkā tykuse ari grupa “Bez PVN” i dzīduotuoja Diona ar dzīsmi “Šaļti”.
Itūgod pyrmū reizi aptaujis viesturē uzvarātuoju nu 15 finaldzīšmu nūsaceis tik i vīneigi klauseituoju i skateituoju bolsuojums nūslāguma ceremonejis tīšraidis laikā 27. janvārī eisai piec 21.00 stuņžu Latvejis Radejis 2 i LTV1 tīšraidē i sabīdryskūs medeju portalā LSM.lv nu Daugovpiļs Olimpiskuo centra. “Muzikālās bankas 2023” finalšovu vadeit uztycāts muzikam i producentam Helvijam Fiņkim.
Apkūpojūt rezultatus, par vierteiguokū dzīsmi aptaujis “Muzikālā banka 2023” finalā sasaceņss itaidys 15 dzīsmis (nūruodeitys alfabeta seceibā):
- ”Citi zēni”, “Labvēlīgais tips” – “Baļļīte”;
- Chris Noa – “Cik tālu vēl?”;
- Antra Stafecka, Ivo Grīsniņš-Grīslis – “Dzīparos”;
- “Triānas parks” – “Es gaidu ziemu”;
- “Astro’n’out” – “Ilgošanās zvani”;
- “Prāta vētra” – “Karalienes valsis (Dame La Mano)”;
- Dons – “Lauzto šķēpu karaļvalsts”;
- “Kautkaili” – “Ļauj man”;
- “Sudden Lights” – “Mēs turpināmies”;
- Aija Andrejeva – “Pērkons pāries”;
- Raum – “Plēsīgi”;
- Fiņķis, Patrisha – “Raķešu zinātne”;
- Intars Busulis – “Spēlē savā burvju flautā”;
- “Bez PVN”, Diona – “Šaļti”;
- Artifexlv, Karīna Tropa, Atis Zviedris – “Vēlos dzīvot”
“Muzikālās bankas 2023” leluo finalbolsuojuma dzīsmis viertēja na tik skateituoji, tok ari žureja, kurā pīsadaleja komponists Zigmars Liepiņš, komponists, pianists i aranžātuojs Kristaps Krievkalns, operdzīduotuojs Raimonds Bramanis, dirigents Aigars Meri, dīdžejs, producents i Latvejis Radejis 5 muzykys redaktors Uldis Cīrulis (DJ Monsta), trombonists i Latvejis Radejis bigbenda daleibnīks Uldis Ziediņš, dzīduotuoja Elza Rozentāle, dirigente i dzīduotuoja Laura Leontjeva, muzykys kritiks i žurnalists Uldis Rudaks, kai ari muzikologe i LTV Kulturys redakcejis vadeituoja Ieva Rozentāle.
“Dzīsme “Šaļti” ir par suokumu. Tod – augšonu, pīaugšonu i saaugšonu kūpā. Iz pavysam…“ tai par itū skaņdorbu piec tuo izīšonys saceja dzīsmis vuordu autors Kristaps Rasims. “Mums ir lela prīca sasadorbuot ar Dionu, kuru sovā ziņā varim uzskateit par myusu jaunuokū muosu. Taipat kai i daļa nu grupys “Bez PVN”, ari Diona lelu daļu sova myuža auguse i pīauguse Kuorsovys pusē,” tai Kristaps.
Jaunuo dzīduotuoja Diona Liepiņa plotuoku atpazeistameibu dabuoja ar pīsadaleišonu televizejis šovā “X faktors”. Grupā “Bez PVN” dorbojās: Kristaps Rasims (bolss, elektriskuo gitara), Guntis Rasims (bolss, akustiskuo gitara), Juris Vucāns (bolss, elektriskuo gitara, tausteni), Valdis Vucāns (basa gitara) i Normans Bārbals (bungys).
