Baļtinovys etnografiskuo ansambļa dzīduotuos latgalīšu tautysdzīsmis apkūpuotys “Dzīšmu skreinē”
Rokstu sagataveja: portals lakuga.lv
Izdūts latgalīšu tautysdzīšmu kruojums “Dzīšmu skreine”, kurā atrūnams vaira nakai 100 Baļtinovys etnografiskuo ansambļa dzīduotūs dzīšmu tekstu i melodeju pīroksts latgalīšu rokstu volūdā, informej projekta vadeituoja Marija Bukša.
Kruojums ir eipašs ar tū, ka tymā pyrmūreiz ir veikts notu i vuordu pīroksts taišni Baļtinovai rakstureigajā izlūksnē i melodejuos. “Ituo kruojuma mierkis ir saglobuot, napagaisynuot i nūdūt tuoļuok jaunajai paaudzei Baļtinovys tradicionalū dzīduošonys muoku. Dzīsmis pīraksteitys Baļtinovys izlūksnē aba “volūdā”, kotrai nu tūs ir ari notu pīroksts. Paļdis vysim, pi kuo es grīžūs piec padūma i paleiga, kab kruojums toptu,” soka Marija Bukša.
Baļtinovys etnografiskajam ansambļam ir boguoteiga viesture, tys ir vīns nu vacuokūs i zynomuokūs latgaliskūs tradiceju kūpieju Zīmeļlatgolā. 1978. godā ansambli dybynuoja Lucija Keiša i tymā dorbuojuos tik sešys sīvys. Cauri laikim ansamblī dzīduojuši daudzi bolsi, i 2023. godā Baļtinovys etnografiskais ansamblis kuplā skaitā nūsvieteja 45 godu jubileju.
Baļtinovys etnografiskuo ansambļa repertuars bolstuos iz dzīduotuoju-teicieju saglobuotū folklorys materialu, i kruojumā “Dzīšmu skreine” apkūpuotys dzīsmis nu ansambļa teicieju Eleonorys Vilnis, Helēnys Slišānis, Annys Mežalis, Teklys Ločmelis, Antonijis Tomys, Marijis Bukšys, Aijis Keišys i Elizabetis Kanepis. “Baļtinovys dzīduotuojis var pazeit piec dzagiuzis bolsu, pavasara bolsu, tolku bolsu. Juos dzīd spieceigai kryuteža aba tai sauktajā “lelajā bolsā”. Juos izdzīd cylvāka myuža ritiejumu, dzīd par latvīšu godskuortu svātkim, par vysaidim lauku dorbim,” soka Baļtinovys etnografiskuo ansambļa vadeituoja Antonina Krakope.
Kruojuma attaiseišonys svātki tiks svieteiti 9. februarī 15.00 stuņdēs Baļtinovys Muzykys i muokslys školys kamerzālē.
Kruojums īspīsts “Latgales drukā”, tuo izdūšona nūtykuse ar Vaļsts kulturkapitala fonda mierkprogramys “Latvīšu viesturiskūs zemu atteisteibys programa” i bīdreibys “Latgales reģiona attīstības aģentūra” pīškiertū atbolstu.
