Rokstu sagataveja: portals lakuga.lv

23. februarī myužeibā nūguojuse aktrise Maija Korkliša (1968–2024), informej Daugovpiļs teatris. Jei beja labi zynoma kai ar latgaliskajom lūmom teatrī, tai ari kai Boņuka tāva muosa Anna kinā “Cylvāka bārns”.

Maija Korkliša ar Daugovpiļs teatri beja nu tuo atjaunuošonys 1988. godā, kod īguoja tymā ar tikū izveiduotū akteru kursu. Jei ari beja vīneiguo nu Latvejis teatra viesturē legendarūs Pētera Krilova i Annys Eižvertinis vadeitūs diveju akteru kursu absolventu, kas da ituos dīnys beja palykuse sovā pyrmajā teatrī. Maija paleidzēja Daugovpiļs teatram augt, beja tam uzticeiga ari tuo gryutuokajūs laikūs i nasavteigai, ar degsmi dalejuos sovuos zynuošonuos ar nuokušajom akteru paaudzem. Kaidā nu interveju Maija atsazyna: “Daugovpiļs teatris ir vysa muna dzeive, muna myuža mīlesteiba”.

Latgalīte sirdī i dvēselē nese latgaliskū goru i latgalīšu volūdu ari nu skotivis. Taišni Maija beja tei, kurai tyka uztycāta vīna nu pyrmūs Daugovpiļs teatra izruožu latgaliski – 2012. godā Pēteris Krilovs īstudēja monoizruodi „Rūžys byudu golūs”, kurys pamatā beja Monikys Zīlis speciali Maijai radeituo luga. Itei lūma beja ari vīna nu Maijis meiluokūs. Daugovpiļs teatrī jei ar sovu talantu boguotynuoja cīši daudzys izruodis – “Pie klusiem ūdeņiem”, “Pa Laimis luoča pādim”, “Paradīze”, “Kaija. Izmeklēšana”, “XXL”, “Revidents Sylagolā”, “Hantele killeram”, “Bīstamais pagrieziens”, “Latgalīšu rulete”, “Īsa pamācība mīlēšanā”, “Kaija. Under construction”, “Mazais princis” i daudzys, daudzys cytys. Jei fiļmējusēs na tik kinā “Cylvāka bārns”, tok ari serialūs “Svešā dzīve” i “Likteņa līdumnieki”. Iz skotivis i aizkulisēs jei vysod beja šarmanta, sīviškeiga, cāla, gaiša i ar naaprokstomu īškejū spāku.

Maija Korkliša beja skotivis runys pasnīdzieja jaunajim akterim i dalejuos ar sovom zynuošonom i mīlesteibu pret teatri ari ar bārnim. Nu 2011. goda Maija vadeja bārnu teatra studeju “Arlekīns”. Juos mierkis beja na tik duovuot bārnim zynuošonys par teatri, tok ari drūsmi atsavērt, i kūpā jī veiduoja aizraunūšys izruodis.

Leidzjiuteiba Maijis Korklišys tyvajim, draugim i talanta cīneituojim!